NBC a lundilwa ta manga komilungu

AATOLINKUNDANA yaali yaNamibia oya indile ooyakwawo moshilongo opo ya tinde oku holoka moprograma yo Teevee ndjoka yedhina ‘The Week That Was’ ha yi ulikwa oshiwike kehe.

Eindilo thaneko ndika olya landula omushangwa gwomutoolinkundana, gwoshifo Insight, Tileni Mongudhi ngoka a ti Omuwilikindjayi gwo NBC, Albertus Aochamub okwa ningi etokolo lye oye awike oku keelela opo iiyimbo ya Lady May nenge Martha Namundjebo yaa dhanwe moNBC. Mongudhi okwa ti oNBC ka yi shi ya Albertus Aochamub, oNBC ehangano lyopashigwana. Okwa ti okwa simonona etokolo lya Aochamub oye awike oku indika opo omalwiimbo ga Lady May gaa imbithwe moNBC. Okwa ti ehala ndyoka, olyo shigwana, onkene shika osho shina uuthemba oku gandja eindilo ndyoka.Okwa ti egandjo lye lyuusama ndika ina li tulwa mombepo, sho opgrama ndjoka ya li ya kwatwa ya ka tumwa mombepo osoondaha. Mongudhi okwa ti ota ka indila aatoolinkundana ooyakwawo opo ya kale noku tinda oku holoka moprograma ndjoka. Okwa ti oshinima oshiwinayi okungambeka epopyo lyaatoolinkundana ndyoka lya kwashilipalekwa kekotampango lyoshilongo. Omutoolinkundana gumwe, Toivo Ndjebela , gwoshifo sho New Era ngoka a li woo a pamwe na Mongudhi moprograma ndjoka okwa ti oshinima shoka sha ningwa osho engambeko lyoku shanga.Albertus Aochamub kombinga ye okwa ekelehi omipopyo ndhoka a ti ye iha shangulula ooprograma. Kombinga yetokolo shina sha na Lady May, Aochamub okwa ti omwiimbi ngalo ngoka okwa yono komeho goshigwana, onkene opwa li pena gumwe ena okuninga etokolo ongo omuwiliki. Okwa ti eelo lye olya egulukila ayehe ngaashi mboka yaa uvite ombili yooMongudhi na Ndjebela opo ya kundathane.