Navachab mekanka oshiwike shi

KONYALA aaniilonga omathele 200 pomina yoshingoli ya Navachab popepi noKaribib oya tameka oshipotha metine, konima sho oonkundathan kombinga yoondjambi pokati kehangano lyaaniilonga yomoomina newiliko lya Navachab dha adha ekwena lya hula.

Amushanga ta kwathele gwa MUN, Ebben Zarondo okwa lombwele oThe Namibian kutya aaniilonga 209 yomaaniilonga 257 mboka ye li iilyo ya MUN oya hogolola oku ninga oshipotha omanga aaniilonga yaali ya ti yo itaya ka kuthombinga moshipotha shoka sha thanekwa.Iilyo iikwawo mbyoka inaa yi hogolola ota ku tiwa oya li mefudho. Zarondo okwa ti aaniilonga oyendji oya hala oku ninga ekanka, onkene ota pa ka ninga oshipotha shokwaa ya kiilonga. Okwa koleke kutya aaniilonga 209 mboka ya hogolola oku ninga oshipotha osha yela kutya ota ya ka kankameka iilonga pomina ndjoka, na ishewe mboka ya li mefudho no inaya hogololola otashi vulika na yo ya kuthe ombinga moshipotha shoka. Okwa ti ehangano lya Navachab olya tseyithilwa kutya ekanka ota li yi komeho. Omautho noompango dhekanka nadho odha uvathanwa nokuziminwa, noshipotha osha tameke etine oshiwike shika. Omuwiliki gwiilonga yaNavachab, Johan Coetzee okwa ti MUN nomina oya ndopa okutsa kumwe moonkundathana dhoondjambi. MUN okwa li ta pula egwedhelo lyooperesenda 12 mondjambi yomuniilonga kehe omanga Navachab okwa li iilongekidha oku gandja oopersenda heyali kwa gwedhwa iimaliwa koomuma yoodola 800, konima sho MUN a li a ekelehi ethaneko lyegwedhelo lyooperesenda 8. Coetzee okwa ti Navachab oye awike ehangano lyomina hali futu oopersenda 100 lyekwathelo lyuunamiti lyaaniilonga yalyo ayehe nomazimo gawo, Oshikwawo ndika olyo ishewe ehangano ndyoka ha li futile aanona yaa niilonga yalyo enongelo posikola yopaumwene yopo Karibib no hali fala aaniilonga yalyo okuya kiilonga noshowo okuza kiilonga itaa ya futu sha. Okwa ti ngashingeyi omwaalu gwiimaliwa yokufuta oondjambi nomauwanawa galwe oya yi pombanda nooperesenda ne omumvogu omolwa okuya pombanda momauwanawa gekwatho lyuunamiti.Okwa tiNavachab ota ka futa ooperesenda 11 momuniilonga kehe omolwa eyo pombanda miifuta mbyoka.Shika otashi ningwa woo pethimbo lyondjele ye ngushuluko ya li pooperesenda 5 omumvo 2011, omanga ehangano lya li inaali longa nawa omumvo ngoka.Zarondo okwa ti ngele aaniilonga oya pewa ooperesenda 10 dhegwedhelo nena mbaka ota ya ka kala ya nyanyukwa.Aaniilonga ayehe ota ya ka ninga ekanka kakele kaamboka yena iinakugwanithwa yopampumbwe kokaklinika, okupomba omeya momina negameno.