Natu kaleni twa hangana: Iivula-Ithana ta indile

SWAPO ota ka popya nOminsita yIilonga nOmakwatakanithokumwe gopangodhi, Helmut Angula nOmuunganeki gwOpaati moshitopolwa sha Shikoto, Armas Amukwiyu ya ethe iinima mbyoka tayi vulu okweeta etopoko mongundu.

Ndika limwe lyomomatokolo ga li ga ningwa poshigongi shokangundi okaningimatokolo omanene gopapolitika (Politburo), sha ningwa mOmaadaha goshiwike sha zi ko, ngoka ga li ga tseyithwa ku Amishanga-Ndjayi gwo Swapo, meme Pendukeni Iivula-Ithana omasiku ga zi ko.
Omwedhi gwa zi ko, Okangundu haka oka li ka indile oshilyo sho Swapo oshikuluntu Ben Amathila a konakone omapopyo ga Amukwiyu kutya Angula okwa li aniwa popi pu na aantu ye na uukwamuhoko, pethimbo a li ta talelepo omahala galwe kOnooli okuyelithila oshigwana kombinga yoshiketha shoshimaliwa sha pewa Namibia ku Amerika, tashi ithanwa Millenium Challenge Account.
Nande ongaaka, Angula okwa li a ekelehi kokule omapopyo ngaka.
Iivula-Ithana okwa ti Opolitiburo oya dhimbulikitha iilyo yopaati yi kale ya hanagana. Okwa ti mboka yu ukathana otaya ka popiwa nayo, ya hulithe po sho ka yi ipyakidhila nasho.
Nande ongaaka, Iivula-Ithana ina gandja oshizemo shomakonakono ga Amathila, ta ti kutya shika oshinima shopaati shomeni.
Kuyele nuumvo, Oshifo shika osha li sha lopota kutya Amukwiyu okwa li wo a ti kutya Angola okwa li a lombwele oshigongi shoSwapo kutya okangundu kaadhiladhili muule koSwapo, oke li ashike osipana yopaukumuhoko, ya etwa po ku Iivula-Ithana okunyana Omupresidende Hifikepunye Pohamba na yalwe.
Omumvo gwa zi ko, Amukwiyu okwa li a shanga ombapila miikundaneki moka a li a yambidhidha Omupevipresidende gwo Swapo, omusamane Hage Geingob – a hala oye a ka kale okandindaate yopaati momahogololo ngoka taga ka ningwa nuumvo.