Natu hingeni nawa yakwetu: Shilongo ta ti

MUKALIMO gwomOkalongo mOshitopolwa sha Musati tate Nestor Shilongo okwa shangela kOshifo shika ta kumagidha oshigwana shi hinge nawa iihauto yasho molwashoka otayi mana po aantu omasiku ngaka.

Shilongo ta ti; Aanamibia yakwetu natu hingeni nawa nokusimaneka omadhidhiliko gomoondjila opo kushonopekwe iiponga yomoondjila tse tu hupitheni oomwenyo dhetweni nodhaafaalelwa yetweni. Ta ta tsikile ko ta ti, yakwetu otu lyeni nale moshiponga oshinene shomukithi gwoHIV-AIDS ihe natango otatu gwedha ko ishewe shoka shiiponga yomoondjila yiihauto. ‘Natu simanekeni oompango dhomoondjila opo iiponga yomoondjila yishonopale.Otandi indile aatoti yooveta, ya talulule Oveta yokuhinga nuuhasha opo kehe ngoka taka hinga nuuhasha, a pewe egeelo, oshoka okuhinga kumwe ngaye otandi ku eleke nonkembadhala yedhipago. Oshoka ngele ou na ombapila yokuhinga, nena ou shi nawa omadhidhiliko noompango dhomoondjila. Omolwashike wu na okuhinga waa na ko nasha? Shilongo ta ti nokupula ngawo nokwiindila koshigwana hashi hingi iiyenditho shi simaneke ooveta dhomoondjila. Ta indile wo nesimaneko enene Aapolisi ya pewe oonkondo dhokupatrola moondjiola oonene ethimbo kehe, unene tuu moondjila ndhoka dhi li pokati koondoolopa nokutula po ooveta dha yaga komuntu, oshoka aantu ohaya hingi unene nuuhasha. Taya hingi nondapo ya pitilila, ye li kohi yondhungo. Shilongo ta ti okuhinga wo waa na ombapila yokuhinga nasho otashi etitha iiponga oyindji yi nyanyaleka moshilongo. Shilongo ta tsikile ta yelitha kutya iiponga ohayi holoka unene pomathimbo gomatango manene. Ta indile koshigwana shi hinge nawa pethimbo lyiituthi mbyoka iinene. ‘Nda galikana, iituthi mbyoka iinene tu yi ningeni iituthi yomanyanyu, inatu yi ningeni yomaluhodhi. Namibia evi lyetu twe li mangulula, onkee natu li tuleni pomuthika gwesimaneko li lile po oomwenyo dhaakwashigwana ayehe,’ Shilongo ta kumagidha ngawo nokugwedha po ta ti kutya oondjila ndhoka a koneka hadhi hingwa nayi unenen moNooli ya Namibia ongashi mondjila yopokati kOutapi nOshakati, Oshikango nOndangwa, Ondangwa nOmuthiya, Okalongo nOshakati, Okahao nOshakati, Onhuno nEenhana, Omungwelume nOshakati, Ondangwa nOshakati noshowo dhilwe dhi nodhi ili moNamibia okuza kuuzilo sigo okuuninginino nokuza kuumbangalantu sigo okuumbugantu wayo.