Natango oyendji oye li muupyakadhi womeya

AANAMIKUNDA oyendji moshitopolwa sha Kaango oye li natango muupyakadhi womeya gefundja na Ehangano lyOmushigakano Omutiligane – otali tsikile natango nokuya thikila ootenda dhokulala.

Nonande omeya momulonga gwa Kavango oge li ga shuna pevi pomahala ogendji, iishana yomokandjohogololo sha Mukwe oyi li natango yu udha omeya.
Aanamikunda omayuvi okwa li kwa tegelelwa ya pewa iikulya oshikando ohela, konima yoomwedhi dha konda pu mbali sho omagumbo gawo ga li ga kombwa po komeya.
Aakalimo yomuMukwe mboka omapya gawo opo ngaa ge li natango, oye na ishiwe uumbanda kutya oondjambo ndhoka nadho dha gumwa wo kefundja, otashi vulika dhika ha hanagule po omapya gawo.
Omukuluntuwiliki gwOshikondo shOmakwathelo gOpaulumompumbwe mOmbelewa yOmuprimaminista, Japhet Iitenge, okwa li moshitopolwa sha Kavango oshiwike sha zi ko okutala kutya onkalo oyi li ngiini nokugandja iinima mbyoka ya pumbiwa kaantu noonkondo.
Pethimbo lyoshigongi shoka a li a ningi naantu mboka ye li pOkamba ya Kamutjonga (yi li ookilo 30 okuza pu Divundu) mEtitano, Iitenge okwa li aantu mbaka ya li ye ya pu Kamutjonga oshiwike sha zi ko, otaya ka pewa uusila wepunga okuza kOkampani ya Kavango Mills.
Iikulya yilwe mbyoka wo taya ka pewa oyo omagadhi gokuteleka noohi dhomoondooha, ndhoka dhi li aniwa dha ninga po oontshona pethimbo ndika.
Okwa ti oshinima shompumbwe yiikulya, okwaapo nawa kwomeya gokunwa ga yela oya taalela wo aantu mookamba dhi li 24 (dhaamboka ya gumwa kefundja), ndjoka a li a talelepo.