Natango AaZimbabwe oye li muumbanda

HARARE – Omuprimaminista gwa Zimbabwe, Morgan Tsvangirai, okwa ti Epangelo lyOpaukumwe moshilongo shika inali hulitha po omauwinayi ngoka taga ningilwa iilyo yongundu yawo.

Tsvangirai okwa popi wo kutya AaZimbabwe oye natango ondjala noye li muumbanda. Shika okwe shi popi pethimbo a li ta egulula Okonferansa yopaati yawo yo Movement for Democratic Change (MDC).
Tsvangirai okwa ti omilandu odhindji dhi na sha nokukalekapo uundemokoli moshilongo inadhi tulwa wo miilonga na shika osha etwa kaantu mboka inaya hala omalunduluko gopaundemokoli.
‘Oshinima shimwe osho shika kutya nonande opaati yetu oyi itula mo momukalekapo oveta nelandulathano, iilyo yetu otayi tsikile mokuningilwa omauwinayi gopapolitika,’ Tsvangirai ta popi ngaaka.
Aagameni yuuthemba womuntu niilyo yongundu dhompilamena ye li 18 mboka ya li ya ningilwa oshipotha shonkambadhala yokuumba ko Mugabe koshipundi, oya li ishewe ya kwatululwa po omasiku ga zi ko na oshipotha shawo osha falwa kOmpangu yOpombanda.
Omuwiliki gwa MDC okwa ti opu na uudhigi okukala mEpangelo nOmupresidende Robert Mugabe. Ta ti, ye oonkondo dhe mEpangelo ndika ong’Omuprimaminista odha ngambekwa.
‘Tse otu li mEpangelo nongundu ya Mugabe yo Zanu-PF. MDC oku li mEpangelo ihe tse katu shi Epangelo.
Mboka ye li mEpangelo otaye ku lombwele kutya Epangelo ndika otali ende kokangodhi okashona,’ Tsvangirai ta popi ngaaka.
Okwa ningi eindilo kaawiliki yiilongo yAafrika lyUumbugantu yi kwathele mokukandulapo oontamanana kombinga yaangoka e na okupewa oshipundi shUukuluntuwiliki wOmbaanga yEpangelo noshaHahenda-Ndjayi gwEpangelo.
Aayambidhi ya Mugabe na Tsvangirai oya li ya kala mokwiidhenge mumwe kombinga yetokolo lya Mugabe kutya Gideon Gono na tsikile niionga ye yUukuluntuwiliki wOmbaanga ndjika ye Johannes Tomana ta tsikile wo niilonga ye yUuhahende-Ndjayi.
– Nampa-AFP