Napwu a tinda okufuta iigandjwa yokomwedhi kuNUNW

ONDUNDA yomahangano ganiilonga moNamibia National Union of Namibian Workers(NUNW) nehangano lyaniilonga haayalongele Epangelo lyaNamibia Public Workers Union (NAPWU}oya palamenathana. Mongashingeyi omahangano gaali ogi itaalela oshoka Napwu okwa kaleke iigandjwa ye yoodola 60 000 koNUNW yokomwedhi.

Shika osha ningwa ongo enyenyeto molwaashoka anuwa NUNW okwa konene aaleleli yaali aanene yoNAPWU moku ya simonona ngele oye na tuu shili nuuwanawa waniilonga komutima. AmushangaNdjai gwo Napwu, Petrus Nevonga nomuPelesidende gwo Napwu Eliphas Dingara iilyo yewilikongundu lyehangano lyoopenzela dhaaniilonga yEpangelo(GIPF) ndyoka aaniilonga yawo ya ningile ekanka konima sho oonkundathana dhi na sha negwedhelo lyoondjambi lya adha ekwena lya thita.Ota ku tiwa aaleleli ya niilonga mbaka oya li ya gama kombinga yaawiliki yoGIPF pethimbo lyoontamanana, shika osha li sha geyeke aaniilonga noshowo aakuluntuwiliki yoNUNW. Oya ti aaleli mbaka yoNAPWU oya landithapo uuwanawa waniilonga konima sho iilyo yewilikongundu lyoGIPF yiigwedhele noopelesenda 20 noshowo ya gwedha ko kiimaliwa yawo yoocellphona noopelesenda 50 yo taya gwedhele ishewe anuwa iimaliwa yeinyanyudho yomeningela dhoGIPF noopelesenda 100. Mekondjithathano aaniilonga mboka ya li ta ya pula egwedhelo lyoondjambi lyoopelesenda 12 ina ya pewa shoka ya li ta ya indile. Shika osha li sha thiminike AmushangaNdjai gwoNUNW Evilastus Kaaronda a ulike ewilikongundu lyoGIPF omunwe te li lundile tati ota li iyambapaleke lyo, ota li mwenya kohi yomagadhi manga aaniilonga ta ya si omukaga. O The Namibian oya uvu kutya Napwu okwa tokola kaafute iigandjwa ye yuukwashilyo woNUNW. Ota ku tiwa etokolo ndika olya li lya ningwa ku Nevonga na Dingara puuyali wawo, na ngashingeyi anuwa ota ya kambadhala oku mona eyambidhidho kaaleli yalwe mehangano.Ota ku tiwa otjeke yiimaliwa yuukwashilyo oya li nale ya shainwa komudhiginini gwiiniwe gwaNapwu ya tegelela okufalwa koNUNW ndele aanambelewa oya lombwelwa ka ye yi fale we.Nevonga ine shitinda nenge e shi zimine kutya osho shili ngaaka.Okwa pula oThe Namibia kutya olye eyi lombwele, ta gwedha ko ta ti kala puuyelele, lombwela ndje ngoka e ku lombwele. Okwa kala nokukondjitha kutya oshifo na shi mulombwele kutya olye eshi pe uuyelele mbuka , opo a tye sha, ndele konima okwa ti oshinima shika, osho momakutsi ashike gomahangano ngaka gaali.Ta ti tse’ ihatu gandja omushangwahokololo kaatoolinkundana.’ Omupelesidende gwoNUNW omusamane Alpheus Muhewa okwa ti oshinima oshopokati komahangano ngaka gaali no ina manguluka okushikundathana niikundaneki. Okwa ti oshinima oku shishi na, oongundu ndhika mbali otadhi shikundathana, unene tuu molwaashoka, oshinima shopawiliko.Omukalo nguka Napwu a longitha ogwa landula omapyopyo kutya opuna edhiladhilo oku kutha mo Kaaronda na Muheua mewiliko lyoNUNW okushitalela maakalelipo 15 mboka NUNW e na okutuma kolutu lwomahogolo loSwapo nuumvo. Napwu, Nantu nosho MUN ogo omahangano gaaniilonga ngoka haga gandja iimaliwa oyindji koNUNW opo ehangano ndika li vule okulonga. Omimvo ndatu dha piti NANTU okwa li a tindi okufuta iigandjwa ye konima sho AmushangaNdjai gwoNUNW Peter Naholo a li a kana momehogololo poshigongi oshinene shoNUNW.