Nantu a hala omakonakono ga gwedhwapo mondondo 10

EHANGANO lyopashigwana lyaalongi moNamibia[NANTU ] olya indile Uuministeli wElongo opo wu etepo ekonakono lya gwedhwapo lyaalongwa yondondo 10 mboka ya ndopa niitsa yi li pokati ko 17 no 22.

Amushanga gwa Nantu, Basilius Haingura okwa ti ota yambidhidha etokolo lyaMinista Abraham Iyambo okupitika mboka ya ndopa ya endulule ye li miipundi. Ndele okwa hololola omaipulo ge kombinga yomahala moongulu dhokulongela ngoka tashi vulika taga kala gaahepo. Noshowo iimaliwa mbyoka aakuluntu yaanona mbaka yena okulongitha oku ya futila omanongelo. Okwa thaneke kutya oshihwepo ngele uuministeli oweeta po omukalo gwekonakono lyagwedhwapo li shangwe pokati ka May na Juni omumvo kehe pehala lyoku pitika aanona yeendulule nenge ya ka longwe mootundi dhoNamcol. Namibia okwa mono iizemo yaali nawa mekonakono lyondondo 10 omumvogu sho konyala etata lyaalongwa mboka nyolele ekonakono lyondondo 10 ya li inaya mona iitsa ya gwana oku ya fala kondondo 11. Aalongwa omayovi 33 570 yomiipundi oya li ya nyola ekonakono nomwaambaka omwa piti owala aalongwa yeli omayovi 17 187 nenge ooperesenda 51,2 shaalongwa ayehe. Nonando omwaalu nguka ogu li pombanda nguka ogwa talikako ongo epito ewanawa okuyeleka nomapito gomimvo dha pitapo okuza tuu omumvo 1993. Nando ongawo aalongwa yeli omayovi 16 383 oya ndopa nenge ina ya mona iitsa ya gwana okuya fala kondondo 11. Mbaka oye li moongundu dha yooloka shiikwatelela kiitsa mbyoka ya mono na oya pitikwa ya endulule ongundu ndjoka pomanongelo gawo nenge okupitila moNamcol kwaamboka yena iitsa yili popepi naambyoka ya pumbiwa yili 23. Minista Iyambo okwa tile kutya aanona mbaka ota ya pewa ompito ya endulule oshoka monakuyiwa otaya ka tya sha mehumokomeho lyoshilongo. Okwe ya indile opo ya longithe ompito ndjika nawa opo ya pite omakonakono gawo nuumvo niitsa yili hwepo oshoka ompito ndjika ita ye ke yi mona we monakuyiwa.