Namukuwa a hahalwa nekatana e ta kuthwa iimaliwa

ONKUNDANA ye tu zilila momukunda Olukulo mOmbalantu moshitopolwa sha Musati otayi ti kutya okakadhona koomvula omilongombali (20) lwaampoka Hilda Namukuwa Simon, komatango gEtine lya zi ko oka li ka ponokelwa kombotsotso ndele taka hahalwa nekatana keke lyokolumoho nokuyekwa okandjato ka ko niinima yako kombotsotso ndjoka, sigo oompaka inayi kwatwa natango kOpolisi ndjoka yi li tayi yi kongo noonkondo.

Pahokololo ndyoka lya pewa Oshifo shika kuyinagona gwa Namukuwa, Auguste Katumwa, ota ti kutya esiku ndyoka lyOlyomakaya Hilda Namukuwa nguka okwa li a ya koshigongi shAagundjuka kOngeleka ya Nakayale na shi ya zimbuka omutenya gwOlyomakaya ngoka okwa yi mondjila a shune kegumbo.
mOndjila yokuya kegumbo okwa ka pita pegumbo limwe pu yinagona LuiseKafimbi. Sho a zi mo okwa thindikilwa kaagundjuka yakwawo yaandja yinagona Luise. Mondjila oyiitsu mu meme gumwe gwokomukunda gwawo, ano mu meme Loide Elungu. Yakwawo mboka yaandja meme Luise, sho ya mono kutya Namukuwa oku li na meme Loide gwokomukunda gwawo, oya shuna kegumbo.
Manga ngaa Namukuwa na meme Loide taya ende ya thinda mokaluhwa, oya mono konima yawo ku na omuntu e ya lamba. Namukuwa aniwa okwa pula meme Loide kutya nge oku wete tuu omuntu ngoka e li konima yawo e ya lamba. Meme Loide naye omuntu ngoka okwe mu tala, nokonima omuntu ngoka okwa kana mo mondjila, nani okwa yi mooha miihwa.
Manga ngaa taya ende ya thinda nondjila yawo komeho komukunda gwawo kOlukulo hoka, oya papala ashike omuntu ngoka e ya mbandukila okuzilila mooha miihwa moka, a homata ekatana. Okwe ya a ukilila ku Namukuwa nokutameka te mu yeke okandjato ke.
Moku ka kondjela moka, omentu ngoka okwa kutha ekatana lye nokwa halala Namukuwa keke lyokolumoho. Namukuwa sho a mono kutya nani ta dhipagwa nenge ta monithwa oshiponga, okandjato okwe ka etha nomentu ngoka okwa matuka po nako, a thinda miihwamoka.
Mokandjato omu na nee kwali, Embo lye lyOmaimbilo lyEhangano, OoN$200, Oselefona ye noshowo Okamutse ke.
Namukuwa na meme Loide oya fadhu ka po nokuya kegumbo lyaandja Namukuwa hoka ya lombwele yomegumbo shoka sha ningwa po. Namukuwa okwa falwa meendelelo kOshipangelo shEpangelo shAutapi omanga yaandjawo yamwe taya ka lopota oshiningwanima shika kOpolisi yAutapi.
Pethimbo ndyoka okwa li kwa toka nOpolisi inayi vula aniwa okuya ko kehala hoka uusiku mboka, oya tega kushe noya yi ko nokutameka okukonaakona.
Tayi yi mompadhi ndjoka ya kanene moshana shomwiidhi omule shi li mpoka.Namukuwa okwa kala mOshipangelo shAutapi moka okuza kongulohi yOlyomakaya ga zi ko nokwa lalekwa mo nee ongula yEtitatu lyoshiwike shika.
Ta yi nee kOpolisi a ka tile mo nawanawa oshipotha she shokuyugwa
iinima ye noku ehamekwa ngawo nekatana. Kepulo, Komanda gwOpolisi moshitopolwa sha Musati, Komufala gwOpolisi Simion Shindinge, okwa ti kutya oshiningwanima shoka osha lopotwa kOpolisi yAutapi ndjoka pethimbo ndika yi li tayi shi konaakona muule.