Namoloh methigathano na Ngurare mewawa lyaagundjuka yoSwapo

JULIUS Namoloh okwa ulikwa ongo okandidate opo a thigathanepo na Elijah Ngurare omolwa oshipundu shuuhamushanga wewawa lyaagundjuka yoSwapo. Namoloh na Ngurare otaya ka taalelathana methigathano lyoshipundi shoka pethimbo lyoshigongi oshinene shewawa ndyoka sha thanekwa tashi ka ningwa omwedhi nguka.

Euliko lya Namoloh olya ningwa pethimbo lyoshigongi shongundumutima yewawa ndyoka sha li ko moVenduka ehuliloshiwike lya piti.Ota ku hokololwa kutya ongundu ndjoka ya ulike Namoloh aniwa oya li ya hala oshigongi shongumutima shi undulilwe komeho , ndele aniwa sho shika inaashi ningwa mbaka oya tsakanene mbala omanga oshigongi inaashi yamo opo ya kambadhale okupula shika shi undulilwe komeho ndele ethaneko lyawo ina li taambwa.Omunambelewa gwo National Youth Council, moshitopolwa sha Caprivi, Heather Sibungo okwa tegelelwa a ka thikame mehogololo lyoshipundi shuupevi hamushanga, methigathanopo na Veiko Nekundi ngoka a li a ulikwa kiitopolwa sha Kavango, Omusati, Caprivi,Khomas, Hardap, noshowo Erongo. Iitopolwa mbika oyo ya ulike Ngurare omanga Namoloh na Sibungo yuulikwa kiitopolwa Oshikoto nOhangwena poshigongi shongundumutima.Ngurare sho a popi peegululo lyoshigongi olyomakaya okwa indile aagundjuka yaa hepeke ethimbo lyawo niinima yaana oshilonga ndele ya longithe oonkondo dhawo miinima mbyoka yina sha nonkalathano, nehumokomeho lyopapolitika nopamahupilo. Okwa ti pauhandimwe yo iilyo yewawa lyaagundjuka, omanga melongelokumwe yo oyo aawiliki. Okwa ti mokati kaantu omuna aluhe omayooloko ndele ngaka na ga kale ge nasha niinima tayi gumu onkalamwenyo yaantu ndele ha ku tala noku popya iinima mbyoka yopaumwene nenge yuukilila omuwiliki gwontumba.Okwa ti omathimbo ga piti mewawa lyaagundjuka omwa holoka aantu yehole oku popya iifundja, yo mbika ita yi tsu kumwe nomalalakano gewawa ndyoka.Okwa dhimbulutha woo aagundjuka kutya yo kaye shi aatumwa yaantu yeli pondje yewawa lyaagundjuka. Okwe ya tseyithile kutya oshilalakanenwa shepipi lyawo kashi oku ningwa iilongitho ya yalwe , mbyoka hayi ekelwahi uuna yaana we oshilonga. Okwa indile aagundjuka yaa kale yombiliha, Ati yo oya joina ewawa lyaagundjuka moSwapop ndele ina ya joina oohandimwe, onkene okwa kumagidha mboka ya hala okulongitha aagundjuka omolwa omalalakano gawo, yeethe aagundjuka ya longe iilonga yawo.Okwa ti ewawa lyaagundjuka oli na oku gandja ewiliko, noku kwatelakomeho aagundjuka mekankameno lyuukumwe nuushili.Okwa ti ewawa lyaagundjuka ota li ka tula poshitaafula omathaneko milandu dhalyo kombinga yomahupilo, elongo, uutechnology, iikwapondje, nuundjolowele.Poshigongi shoka opo ta pa ka hogolololwa amushanga noshowo omupevi gwe opamwe niilyo yomutima ngundu. Aawiliki yaagundjuka okwa kala ta ku kundanekwa kutya aniwa oye li moongundu shiikwatelela kookandidate ndhoka aniwa taku tiwa odha hala oku thigathanapo ongo aaulikwa mboka taya ka landula omuwiliki gwoSwapo nosho wo omutse gwa Namibia.