Namibia ta gamene Zimbabwe opo kaatidhwe muukwashilyo wa Kimberly

ZIMBABWE okwa taalela ompito yoku tidhwa mo muukwashilyo waashoka hashi ithanwa Kimberley Process Certification. Olutu nduka halu tala kutya uuwe mboka ta u landithwa muuyuni ina u za kiilongo ku na iita nenge ku na eyonagulo lyuuthemba womuntu.

Olina oshigongi mSwakopmund oshiwike shika.Pethimbo lyoshigongi opena eindilo kutya Zimbabwe na tidhwe mo molutu nduka oshoka aniwa aakwiita yoshilongo shoka oya lundilwa ya dhipaga aantu omathele gaali.Oongundu dhuuthemba womuntu otadhi kongo eyambidhidho miilyo yolutu nduka, Namibia oye eli omunashipundi lwalo, otalu pulwa lu ngambeke etumemo lyokawe okuza moZimbabwe pahokololo lyoBBC.Aaunganeki mbaka otaya ti aniwa aakwiita oya dhipaga konyala aantu 200 pomina yokawe.Shika oshiikalwa kepangelo lya Zimbabwe.Namibia okuli kuume komuleli gwa Zimbabwe omusamane Robert Mugabe ngoka ta ku tiwa aniwa okwa mono uuwanawa owindji mokawe.Omutotimpango gwa Namibia Bernhard Esau okwa lombwele BBC Network Africa kutya Zimbabwe oku na uupyakadhi woshili na okwa pumbwa ekwatho opo a kale oshitopolwa sholutu nduka nezimo ndika.Okwa ti opuna uupyakadhi mokweenditha okawe noshowo okutula ehala lyomina yokawe molugumbo sha ha la okutya okawe kamwe oka pitile moombuthulu.Ndele okwa ti ina pa tseyithwa nando kutya opena aantu ya dhipagwa sho ye a li a talelepo omina dhokawe dha Marange.Poomina ndhika opo pwa li ha pa kongwa okawe kaakwashigwana opo ya ka landithe komaalaka kaadhi shi dhopambelewa.Konima aakwiita oye ya mehala lyoomina ndika omumvo gwa yi aniwa noku dhipaga konyala aantu ye li 200.Gumwe gwomwaamboka ya mono shika nomeho okwa ti aakwiita oye ya nooniitayalukunku naapolisi oya umbu mboka ya li pomina ndjika yokawe.Omukongi kawe gumwe okwa hokolola nkene a ponokelwa kaakwiita pethimbo ya li taya tidhwa po mpoka.’Onda dhiladhila oya li ya hala okudhenga ndje ndele oya lombwele ndje ta ya ti: Nena ngoye oto ningi omukiintu gwetu,’ osho a ti’Onda mono kutya ota ya ka kwata ndje koonkondo’Ongundu yuuthemba womuntu yedhina Human Right Watch oya ti opolisi naakwiita oya lundululile ehala ndyoka lya li, li na ombili mehala lyevundakano.Ota ya ti aakwashigwana ngashingeyi ota ya longithwa okukonga okawe omanga iimaliwa oyindji ta yiyi kongundu yo Zanu-PF.Ehangano lyo HRW olya ti olutu lwa Kimberly olu na okusoshimpwiyu kutya ha kawe taka fulwa mehala moka uuthemba womuntu ta u longithwa nayi.Olutu lwa Kimberly ndoka luna iilyo 70 nolwa thikamene po 2003 nelalakano oku kwashilipaleka aalandi yokawe kutya okawe ina ka za pehala lyina iita nenge iimaliwa mbyoka ya landwa okawe ita yi ka longithwa oku tilahi ombinzi.Mbaka ota ya londodha kutya ngele olutu nduka ina lu ganda Zimbabwe ota lu kanitha einekelo mulwo.Ndele aayambidhidhi ya Mugabe ota ya ti olutu elalakano lwalyo olyo ashike okutala kutya iiyemo ya za melanditho lyokawe ita yi longithwa okutilahi ombinzi onkene Zimbabwe ina pumbwa a tidhwe mo molutu nduka.Aatseyinawa yamwe ota ya ti kutya nee Zimbabwe oku tidhwe mo,natango uuwe wumwe we otau ka thika komalanditho guuyuni.Oshigongi shika ota shi hulu metine.