Namibia ota landa epungu koZambia

NAMIBIA , Zimbabwe na Democratic Repubilc of Congo oya thaneka okulanda epungu okuza ko Zambia nuumvo.

Oshilongo shika osha longele epungu olindji omumvo gweteyo 2009-2010. Pahapu dhomuwiliki gwehangano lyompungulo yiikulya ya Zambia [FRA] epangelo olya pitika opo aanafaalama noshowo aalandithi ya landithe po epungu lya hupako lyootona 1,1 kiilongo yopuushiinda muumbugantu wAfrica. Zambia okwa longo omumvo nguka epungu lyootona oomiliona 2,7.
Anthony Mwanaumo okwa ti yo oya indilwa nale ku Namibia, DRC na Zimbabwe oshoka mbaka oya hala oku landa epungu ndyoka lya hupako.Okwa ti yo oyuuvite uuntsa sho taya vulu okupalutha oshilongo shawo ndele oya nyanyukwa woo sho taya vulu okukwathela iilongo yilwe mbyoka ya pumbwa oondya nopamukalo nguka ota ya etapo egameno lyiikulya menenevi.Mwanaumo okwa ti FRA otaka landa ootona omayovi 470 000 gepungu okuza kaanafaalama aashona yeli omayovi 300 000 konima sho ehangano ndika lya pewa omukuli gwoodola dhAmerika oomiliona 140 opo ya lande epungu ndyoka. Iimaliwa mbika oya gandjwa kombaanga ya Standard Chartered ya Zambia. Oshipandi shoomiliona 25 osha pewa nale FRA naambyoka ya hupako ota yi ka futwa muule wiiwike ta yi landula . Omupopiliko gwehangano lyoondya lya Zambia[FRA] Mwamba Siame okwa lombwele oshikundaneki sha Reuters kutya ehangano lyawo olya landitha nale ootona 82 000 dhepungu etokele ku Zimbabwe. Okwa ti epungu olya li lya mbesitelwa mu Auguste ndele olya li ashike lya kolekwa moshiwike oshitiyali sha September nuumvo naanambelewa mo Zimbabwe ina ya mana natango okututamo epungo lyawo ndyoka.
Ehangano lyopashigwana lyaanafaalama lya Zambia olya li lya indile opo epungu li landithwe pondje, opo ondando yepungu yi tulwe pombanda, nongeyi aanafaalama ota ya ka longa epungu olindji ishewe omumvo tagu ya. Siame okwa ti opwa tegelelwa ondando yepungu yi ka londe pombanda pokati ka Kotoba nuumvo na February 2011 nehangano lyokupungula iikulya olya tegelela oku landitha epungu oli ndji pethimbo ndyoka.Ompumbwe yoondya oha yi yi pombanda olundji pethimbo ndika.