Namibia ina pumbwa oitopolwahoolo ihapu

Efimbo ola fika opo ovanapolitika va kale tave liningile omauwa.

Eedula omulongo dapita, ongudu tai pangele okwa li ya kondjifa opo kuningwe oshitopolwahoololo shopapolotika koKavango neudaneko eli kutya exumokomesho otali ka endelela nawa koshitopolwa osho shaNamibia notali ka vatela okukufa ovanhu vahapu moluhepo.

Oshinima eshi okwa li ashike sha ningwa opo ovanhu ve lingile eemhito davo doilonga mepangelo “okweeta omayakulo popepi novanhu”.

Oivike ya pita oikonga ya faafana natango oya tameka vali. Okuninga oitopolwahoololo i li 14 moNamibia momudo 2013, paife ovaleli vokoshitoplwahoololo shaKavango Ushilo otava pula opo oshitukulwa shi tululwe luvali noikandjohoololo i ninge oyo ashike i li ihamano i ningwe 20.

“Etopolo eli otali vatele oinima youdemokoli i kale tai ende nawa, otali eta omayakulo epangelo popepi novanhu notali enda eyambulepo neyokomesho,” Omunashipundi wewiliko laKavango Ushilo Damian Maghambayi.

Eshi ovanapolotika va dopa okupopya oshe shi kutya okuninga oitopolwahoololo noikandjohoololo ihapu omukalo wokutota eemhito davo doilonga.

Oshimaliwa shotekisa otashi ka longifwa nee okuhadeka eendjato dovanapolotika tete nookaume kavo, omanga oixupe inai yandjwa kovakwashiwana ovo va pumbwa omayakulo moshili. Oitopolwahoololo noikandjohoololo oyo kwa li ya totwa eedula twa dja kai na eshi ya eta po, kutya nee oukoshoki, oipumbiwa yofikola, oipangelo nounamiti kovanhu ovo ve li momumbwe yoshili.

Oshinima shimwe, nOmuthiya otau longo noudjuu okuninga odoolopa yopamufika.

Oshilongo ashishe, eedolopa noikandjohoololo ei opo ya totwa oyo unene ina oupyakadi wolusheno, omeva noipumbiwa ya keshe efiku yovakalimo.

Okuyelakanifa, ovanapolotika ovo hava hoololwa va ninge eekamusela doikandjohoololo oyo ovo ashike hava mono omauwa shi dulife onduba yoshiwana oyo tai mono oixuna.

Ohatu pula pelesidente nongudu yokutopola oitopolwa opo vehe itavele okutopaula oshilonga moinyanyu medina ashike lomaudaneko ehe na omwango okuyandja omayakulo omanga oukwashili oyou kutya oshinima osho osha kala nokuningwa okudja ashike eshi oshilongo sha manguluka ndele kashi li dule.

Okuyandja omayakulo kaku na sha nokutota eemhito doilonga dovanapolotika, oku na sha nokulongifa omaliko oshilongo nawa nomauwa ovakwashiwana aveshe.