NACA a lundilwa ta tilitha aaniilonga aniwa

EHANGANO lyUupale woondhila nenge Namibia Airports Company olya indilwa opo kaali shaine omauvathano giilonga omape naaniilonga yalyo , omanga oshipotha shokwaa uvathana shoka, sha lopotwa kombelewa ya kOmufala gwaniilonga inaa shi monenwa eyamukulo.

Eindilo ndika olya ningwa kehangano lya Namibia Transport and Allied Workers Union[Natau] sha landula omalongekidho ngoka aniwa geli metifa oku lundulula onkalo yiilonga mehangano ndyoka unene tuu kombinga yoondjambi dhawo. NAC ota kutha aaniilonga ye ayehe miilonga oshiwike shika, kakele komunambelewa omukuluntupitithi, Ben Biwa oye awike itaakuthwa miilonga. Aaniilonga mbaka ota ya shunununwa ishewe miilonga mbika sho taya pewa ya shaine omauvathano omape giilonga nehangano lyawo ndyoka. Omuwiliki gwa NAC okwa li a endululwa kiikundaneki aniwa ati oshinima shika itashi shuna monima. Natau okwa kundana kutya NAC ota tsikile noku pa aaniilonga omauvathano omape giilonga nonando kapena euvathano kombinga yekuthomiilonga lyaaniilonga mboka. Komufala gwaniilonga, Bro-Mathew Shinguadja naye okwa li a lombwele NAC kutya elundululo lyomutungilo gwa NAC ota shi ti elundululo meuvathano lyiilonga lyombinga yimwe , tashi ti pwaana etsokumwe pokati komugandji nomutaambi gwiilonga. Amushanga gwa Natau, John Kwedhi okwa ti oshigongi mpoka oongundu ndhika tadhi ka kambadhala dhi tse kumwe osha thanekwa shi ningwe momasiku 10 April nuumvo. Omanga NAC okwa pe aaniilonga sigo omulyo 1 lya April opo ya shaine omauvathano omape giilonga. Kwedhi ota ti omauvathano gamwe aniwa ogeeta mpoka kutya aaniilonga yamwe oondjambi dhawo odha shunwa pevi. Oshiholelwa ongaashi omuniilonga gumwe ngashingeyi ha futwa oodola omayovi 18 000 ndele meuvathano epe ota ka kala ha kwata ashike oodola omayovi ga 7 000, omanga omuniilonga gumwe ngoka ngashingeyi ha kwata omayovi 7 000 ota kala ha futwa oodola omayovi ga 4 000 komwedhi.Kwedhi okwa ti aaniilonga ota ya ka ehamekwa komauvathano ngaka omape ngele oye ga shaina unene tuu okushitalela, ngaashi moku landa omagumbo, onkene yamwe ota shi vulika ye ke ga kanithe.