OSHIPONGA shiiyenditho yi ipumu mumwe omutse nomutse mondjila pokati kOtavi nOtjiwarongo pehulilo lyomumvo 2008, osha fa litha omukwashigwana gwAngola mondholongo yoomwedhi omulongo nahetatu.
Moshiponga shika omwa li mwa sile aantu ayehe kumwe ye li yane mondjila ndjika pokati kiilando mbika iyali moshitopolwa shOtjozondjupa mo 14 ga Desemba 2008.Oonakusa ayehe oya li mosheenditho shimwe, moka mwa hupile ashike omweendimo gumwe tii.Osheenditho oshikwawo osha li tashi hingwa komukwashigwana gwaAngola gwomimvo 34 gwedhina, Antonio Eduardo Dos Santos.Dos Santos okwa tamanekelwa edhipago lyaashi lyoshiningilewina, kombinga yoshiponga shika.Sho a zimine ondjo ye, okwa pewa egeelo lye mompangu ya mengestrata pOtavi metitano lya yi.Mengestrata, Jaco Kennedy okwe mu pe egeelo lyoomwedhi 28 mondholongo, nokwe mu kuthileko oomwedhi omulongo opo muule woomvula ntano a kale inaa uvikila nando epogolo lya fa ndika, lyokuhinga nuuhasha.Eipumomumwe olya ningwa pethimbo Dos Santos oye a li omuhingi gwosheenditho sholuuli lwokolumoho, pethimbo ndyoka nguka okwa li ta pitilile, ololi yoondongelwa.Shono tuu aniwa a yi kombinga ndjoka yaashi ye, osheenditho she oshiipumu moshikwawo shoka sha li kombinga ndjoka. Dos Santos okwa li ta popilwa komunampango gwomoshilando sha Tsumeb, Danie Kotze, omanga omutamaneki, Marius Adams oye a eta po oshipotha noku kalelapo epangelo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
