Mvula Mnyaango a pandula Epapa lye a pewa kOngeleka

OMUNANGESHEFA a tseyika nawa gwomOshakati tate Erastus Kakokolo Mvula, a tseyika wo nawa nedhina Mvula Mnyaango, mOsoondaha ya zi ko okwa pelwe Epapa lyepandulo kOshitayingeleki sha Elim, e li pelwa mOngeleka ya ELCIN mOshakati miipathi yengathithi enene lyOoitaali yOngeleka ya ELCIN nayalwe ya za kOongeleka dhilwe Oomwayinathana.

Omutonatelishitayingeleka sha Elim, Omusita Anna Amupala, ngoka a gandja Epapa ndika komusamane Kakololo Mvula, okwa ti kutya tate Kakololo Mvula, ota pewa Epapa ndika omolu okulonga Oshilonga shEtumo mOshitayingeleki sha Elim mOshikandjongeleka shUuninginino mOngeleka ya ELCIN.
Mokugandja omapandulo ge komeho yEgongalo mOngeleka ya Elcin mOshakati, tate Mvula okwa ti ngeyi; ‘ Onda taamba nenyanyu ompito ndjika yokupewa esimano li vule ndje, opo li hilile ndje, noku igandja ku Kalunga nokEtumo lye eyapuki mOshitayingeleki sha Elim nomoshikandjongeleka shUuninginino. Onda taambele nda li ndi wetele mombululu, ihe ngashiingeyi elalakano olya yelela ndje nawa. Oshikalimo onde shi tala nonde shi dhindi, osho okulongela Kalunga opo oohapu dhe dhi taandele sigo okooha dhuuyuni, pa Mat.28: 19-20.
mOmautho ga ELCIN, Etumo nUudiakoni, oyo iinima mbyoka ya popiwa koshito yina okuyakulwa nokulongwa kOmukriste kehe, omushona nenge omunene, ohepele nenge omuyamba, shaa tuu Uukwanegongalo we inau hula po. Nena otwe ya tu gwanithe po eutho ndika, oshitokolitho oshiti 47, shi ka shi na okuningwa opo aapaagani, aashunimonima, meni nopondje yoongamba dhoshikandjo ya uvithilwe nokulongwa Evangeli lya Kristus. Oshitokolitho 48:2 oshi na oonkondo oshoka otashi tu hilile atuhe keyakulo lyIilonga ya Kalunga.Esiku ndika, meuveko ndika otwe ya tu tuleni uukuni kumwe , u kale oshipandi sha kola, oshoka kehe gumwe ota kala mo nokakuni ke moshipandi shika nokugongelela Etumo. Tse otwa pewa omagano, tu zalekwe, tu pewe Oonzapo omolweni. Ando kamu po, ando inatu pewa oonkatu ndhika, oshoka kape na mbo taa tu pandulile ko ku Kalunga. Iilonga ya Kalunga nOohapu dhe, nando oyendji ye dhi dhina, esiku taa tembuka muuyuni mbuka, ‘Elaleko n Uuyamba’ olyo lya hugunina no ka ku na we gumwe ta ka ninga oshipopiwa konima yaashoka. Onkee oohapu dha kalunga odhi shi okukondjelwa shili dhi kale monkalamwenyo yetu yesiku kehe.Otwa pewa omagano, aamati naakadhona ya kutha ombinga opo yi iyambele oshilonga sha Kalunga mIitopolwa yokOkaoko. Moka tse oohe, ooyina, aamwayina yomuKristius twa pumbwa tu ya kwathele ko nesiloshimpwiyu ndi, tatu nyangadhala mpaka nalyo nena. Otatu geelwa ku Kalunga ngele tatu ya li ondjala, onkayi, nenge itatu pupaleke omitenge dhawo dhomalweendo dhomapango dheilongo lyuunona wawo, nodho ku ya tula pomuthika gu li nawa pandjambi. Shika osha pumbwa eitulomo enene ngaashi Aasoomi ya li taa shi tu ningile, Aatumwa mboka ya longele mokati ketu, oshoka hatse kwa li hatu ya pe ondjambi. Mpo pu thike omuntu ta longo nuudhiginini, opo pe thike uuwehame we u mu li popepi. Aatumwa oya pumbwa Uutemba wohopi, uukambe, uumbasikela, nokomeho ngele twa kola, ando Omusita gwomOpuwo a dhilaadhililwe ohauto opo ngele ta kundana yakwawo yamwe itaa lalapo, ta vulu oku ke ya tala ko mbala noku ya fala kOshipangelo. Sho te tala oshikandjo shetu oshinene sho osha gwana noompumbwe dhasho. Aanangeshefa yakwetu yamwe otaya kwathele mokutunga po Oongeleka, yamwe otaa kwatha nokulandela Omagongalo omakwatho niikwawo ya fa mbika, ashike shika kungame otaa longo etumo lya Kristus. Aanangeshefa yamwe ya kutha po Aasita ya fute oondjambi dhawo omwedhi kehe.
Sho tatu gongele mpaka nena, otatu yi nasho ko Elim, hoka Ongeleki yetu momumvo nguka 2010, tayi ka gwanitha oomvula 140. Otagu kala wo omumvo gwehambelelo, shoka twa piti nuudhigu woomvula mbali dhefundja.
Onda hiya ooyakwetu-kwetu miilongayakulo yoshilonga shetu, yomithika dha yooloka, okuza komagongalo opo ya kwathe ndje tu ka tale ko mbushetu kEngela nenge tatu kutha ko nande Ekopi kOkahao. Otandi indile aamwameme amuhe-muhe mu li mOngeleki muka kaamu ka sithe ndje ohoni, nenge omwa hala mu kasithe ndje ohoni?
Omwa hala ku Elim tu ka thigweni tatu lili? Nge elago olyeetweni, nge ohoni oyetweni, ngeeligolo nenyanyu olyetweni, ano tu zeni mo noondjato dhowala muka nena, tse tu taleni Kalunga nge ite tu yambekeni. Omwa hala tu ka kaleni twa ngwangwana? Ngele hasho, tu gandjeni, tu gongeleni, tu panduleni tu ka sindaneni. Tm.4:7-8, ‘ tate Erastus Kakololo Mvula a ti nokupandula ngawo.