Mvula FC a pewa ooN$10,000 ku Mvula Mnyaango omunangeshefa

OSIPANA yetanga lyokoompadhi yomOmaala mOndonga mOshana yedhina Mvula Football Club, omasiku ga zi ko oya pewa omagano gooN$10,000 komunangeshefa, Erastus Mvula, a tseyika wo nawa nedhina, Mvula Mnyaango, ngoka oye e li mwene gwosipana ndjika.

Omudheuli gwosipana ndjika, Maya Nanyemba ta lombwele The Namibian kutya Mvula FC, oya tameka okudhana moleague ya Maalala yomOshana Village Based Footbal League momumvo 2006 noya kala ngaa tayi hulile pomakati mpoka. Ashike momumvo nguka 2012 oya kutha ko oongaku nokusindana po Oleague yOshana Village Based Football League nokumona uuthemba ngawo okukadhana uudhano mboka hau dhanwa opo wu ye koleague yopombanda, ano okukadhana mOliga yopashitopolwa sha Shana ndjoka hayi ithanwa mOshiingilisa, Oshana Regional Football League. Sho twa dhana ooplay offs, Nanyemba ta ti, oye dhi wina po adhihe noya yi ne koshitopolwa oshitiyali, hoka kwa ya oosipana dho Liga yOpombanda, ndjono yi na ekwatathano nOliga yuudhano wetanga lyokoompadhi yopashitopolwa sha Shana. Nanyemba ota ti kutya momathigathanopo ngoka oya li mo noosipana ngashi ndjoka ya Katana, Omege, nOshitenda. Ta ti Mvula ta dhenge mo Okatana nookola 4 mu yimwe, Omege nookoola mbali monola na hugunina Oshitenda nee shoka ya dhenge mo nokoola yimwe monola, noya yi nee ngawo kuudhano wopombanda moshitopolwa sha Shana.