mOsenda ya Cosdec pOndangwa ina mu kana oshimaliwa, Endjala ta ti

OPU NA omapopyo kutya mOsenda ya Community Skills Development Centre (Cosdec) mOndangwa, omwa kana oshimaliwa shOondola dhi li N$130,000.

Omukalimo gumwe gwomOndangwa okwa lombwele The Namibian oshiwike shika kutya Amushanga mOsenda ndjika oye ta fekelelwa oshinima shika na pethimbo ndika okwa tulwa pevi.
Otaku popiwa kutya Okomisi yi na sha nEkondjitho lyIilonga yOkoraputo nenge Anti Corruption (ACC) oya lopotelwa wo oshinima shika na oyi li tayi shi konakona.
Ihe Menindjela gwa Cosdec pOndangwa omusamane Joseph Kapya Endjala okwa ti mbika iifundja iitokole kutya mOsenda yawo omwa kana oshimaliwa. ‘Inamu inyenga nande oshinima shatya ngaaka,’ Endjala osho a lombwele The Namibian ngaaka ohela.
Kepulo ngele Amushanga gwawo okwa tulwa shi li pevi omolu omapopyo ngaka, Endjala natango okwa ti dhika odhanakalindi. Okwa ti ye shoka e shi osho shika kutya aaniilonga mOsenda yawo ayehe ohaya longo pakondalaka.
Ngele nee ookondalaka oya puko, ohaya kala pomagumbo na omuntu oha ningi nee eindilo okondalaka ye yi tamekululwa. Amushanga mo Cosdec ya Ndangwa, meme Lena Kambonde, okwa ti ye okwa thikama pokomenda ya Endjala kutya, mOsenda yawo inamu kana oshimaliwa shika.
‘Ngame oshinima shika kandi shi shi,’ Kambonde ta popi ngaaka. Okwa ti Endjala oye omutse gwo Cosdec na ina shi pumbiwa we a komende,molwashoka omukuluntu gwawo okwe shi ninga nale.
Kombinga yomapopyo kutya okwa tulwa pevi, Kambonde okwa ti ye oku li ashike pegumbo molwashoka okondalaka ye yomumvo gwa zi ko oya pwa ko na ngaashiingeyi okwa tegelela ashike yi tamekulumwe molwashoka okwa shaina shika e shi ningilwe.
Omukuluntuwiliki gwa ACC Paulus Noah okwa lombwele Oshifo shika kutya omumvo gwa zi ko, Ombelewa yawo oya li ya yakula omanyenyeto kombinga yomakwatonayi giinewe mo Cosdec ya Ndangwa noya Shomeya na oshinima shika oye li ye shi konakona.
Noah okwa ti ACC okwa li e shi mono mo kutya aaniilonga yamwe mOosenda dhika oya li ya ningi uunima wa puka, ihe shika osha holoka po molwashoka ooproyeka dhoka hadhi mono omakwathelo gopashimaliwa komahangano niilongo iikwatheli ngashi Cosdec, kamu naanaa omilandu dhi li po dha yela hoka aaniilonga ye na okwiiyutha.
Noah okwa ti sho ACC a mana omakonakono mu shika, okwa li a tumu olopota yoshizemo shomakonakono gawo kOlaata yOosenda ndhika mbali mu Septemba 2008, dhi tale kutya otadhi ningi po shike kombinga yaashoka ACC a mono po.
Oosenda dha Cosdec ohadhi gandja omadheulo kaakwashigwana miilongo ya yooloka opo ya wepe okweeta po ooproyeka dhawo dhokwiimona omboloto.