mOnoolo otamu kala hamu limwa olwishi

PETHIMBO ta popitha Oshituthi shegandjo lyoonzapo dhaailongi yi ilonga moUNAM, sha ningilwa mOsenda yOmaulikilo gIipindi mOngwediva mEtitano lya zi ko, Omukuluntu gwoshiputudhilo shoPombanda sha UNAM Omundohotola Sam Shafiishuna Nujoma okwa ti kutya moNooli yopokati otamu ka kunwa olwishi miishana moka,noshowo moCaprivi, moshitopolwa sha Kavango nosho tuu pomahala mpoka tapu opalele.

Omundohotola Nujoma ta ti kutya pethimbo lyOshituthi shegandjo lyOonzapo mOsenda yomaulikilo giipindi mOngwediva omvula ya zi ko, gumwe gwomaapopi ya simana esiku ndyoka okwa li a popya nokutseyitha oshinima shokukuna olwishi moNooli pawiliko lyOshikondo shi na sha nIilikolomwa yiikwamapya shOkogongo shoka shi li mewiliko lyOmuprofesore Luke Kanyomeka. He yoshigwana ta ti, shika otashi ningwa oo kukale kwa kwashilipalekwa ekalopo lyiikulya ethimbo alihe mokati koshigwana.
Nujoma ta ti kutya sho pwa etwa edhilaadhilo ndyoka lyokulima nokukuna olwishi nenge oku lu tsika miishana moka, opwa tamekiwa nokudheula aakwashigwana mOprojeka ndjika noye li nale yi ipyakidhila nomalongekidho gomapya golwishi moshitopolwa shomoNooli mwa kwatelwa Oprojeka yokulonga Olwishi ya Kalimbeza moCaprivi. Omundohotola Nujoma ta ti, okwa nyanyukwa okutseyithila oshigwana kutya omakonaakono ge na sha nokweeta po omapya golwishi moshilongo, ano monooli, oge lia ga enda nawa unene niilonga yokukuna nenge okutsika olwishi oyi li pokutamekiwa nayo opo ku kale haku teywa olwishi ngashi naanaa oshigwana tashi limi nokuteya iilya yasho ndele tashi imonene iikulya yesiku kehe.
Tatekulu Nujoma ta ti UNAM okwe shi pondola lela okuulika kutya Namibia ota vulu okwiihupitha ye mwene paikulya, na shoka shi na okuningwa po eitulomo ashike lywetweni oshigwana. Ta ti ngashi Oprojeka yOlwishi ya Kalimbeza ohamu longwa nale olwishi lwootona 8 mohekta.
Shampa ashike ndele elongo lyolwishi nduka tali indjipalekwa okuza pOohekta 200 sigo 300, nena osha yela kutya Namibia otaka kala e na olwishi lwe mwene notaka kala ashike ta mbesitele olushona lela okuza pondje. ‘Otandi ningii nee eindilo enene nde li ukitha kUuministeli wUunamapya, Uuniimuna, Omeya nEgameno lyIihwa wu pule meendelelo ngashi tashi vulika eziminino lyOkabinete kutya Oprojeka ndjika yElongo lyOlwishi yi kale tayi tonatelwa ku UNAM, molwashoka aaniilonga ya UNAM mOshinima shika oyendji oya mona nale omadheulo gawo ko Japan noye li yi ilongekidha okutula milonga iilonga yokulima nokuteya olwishi moNamibia, Omundohotola Sam Nujoma Omukuluntu gwa UNAM ta ti ngawo nomukumo nokutsikila ko ta ti UNAM ota vulu lela okuyelutha po iilonga mbika yelongo lyolwishi moshilongo noku yi eta ponkatu mpoka Namibia taka kala ta longo nokweeta po olwishi lwe mwene ndele taku kala itaku mbesitelwa we omalwishi okuza pondje, nenge ku kale ngaa nee taku mbesitelwa olwishi olushona lela okuza pondje, kashi li we ngashi ngashiingeyi, Namibia i ikwatelela ashike kolwishi tali zi pondje yoshilongo.
Omundohotola Nujoma ta indile ku UNAM a andjaganeke Opjojeka ndjika noku yi fala sigo omOKavango meeendelelo ngashi tashi vulika molwashoka mOkavango omu na ompito ombwanawa yokulima, okukuna, okutsika yokumena olwishi. Tatekulu Nujoma ta ti kutya Okolligi yUunamapya yaGongo oyi shi lela okupandulwa molwashoka oya ya lela komeho nomakonaakono gokulima, gokukuna nokutsika olwishi, ano gokulonga olwishi miishana moka.
Oonkembadhala dhatya ngeyi, Omupresidende gwotangotango gwa Namibia a manguluka Omundohotola Sam Nujoma ta ti, odho ashike tadhi vuku okukutha Namibia kohi uuna tashi ya pompumbwe yiikulya nomeithikameno ye mwene moshinima shiikulya mokati koshigwana she.
‘Onda kala handi shi popi olundji kutya emona lyoshilongo shetu otali vulu ashike okukoka ngele tatu tula ongushu kiilikolomwa yetweni, ano koonzo dhetweni dhopauntshitwe,’ Omundohotola Nujoma ta ti ngawo nokugwedha po ta ti kutya Namibia okwa hala ngeno momumvo 2030, a kale e li pomuthika ngoka gu liwe kiilongo ya putuka muuyuni, ashike onge nee ta longo neitulomo moshinima shUunampaya, shUunangeshefa niikwafaabulika noshowo paikwaunongononi ngashi tau monika miilongo ya putuka muuyuni.
Omundohotola Nujoma ta pandula noonkondo Epangelo sho tali ka yambidhidha Oprojeka ndjika.
Ta ti ngele oshigwana oshi na iikulya ya gwana noyi na uundjolowele, nena otashi kala wo shi na uundjolowele, tashi ilongo nawa notashi kala shi na omeya gayela, uundjugo wu li nawa apehe mpoka, omagumbo, iiyenditho noshowo iilongayakulo yilwe yi li nawa noyiihwapo nawa.
Tatekulu Nujoma ta ti Ooprojeka ngaadhika, otadhi vulu ashike okuya po ngele mboka ya longwa tayi itula mo moshinima shokulongitha ontseyo ndjoka ya pewa meilongo lyawo, ano taya longitha oondunge dhawo mokuninga omakonaakono miinima yi ili noyi ili nokweeta po sha tashi kwathele oshigwana mekuthopo lyoluhepo nokutula po shoka tashi tungu nokuyelutha po emona lyoshilongo noshigwana.
Omukuluntu gwa UNAM ta indile kwaayehe tayi nilongo nokumona oonzapo dhawo, ya ka longithe ontseyo yawo mokati koshigwana, unene tuu moshinima shomapekaapeko nokweeta po mbyoka tayi kwathele meyambulopo lyEmona lyoshilongo noshigwana shamo.