Monika a kwatwa po shi na sha neso lyaMonika

OMUKIINTU gwoomvula 32 gwomomukunda Epoko mOmbalantu mOshitopolwa sha Musati, Monika Amukoto, okwa kwatwa po kOpolisi shi na sha neso lya Monika Ndeshipanda Kondjeni gwoomvula 34, sha ningwa kongulohi yeti 2 Januari 2012 puundingosho wopEpoko mOmbalantu.

OoMonika mbaka ayehe oye na uundingosho puundingosho wopEpoko mpoka, taku tiwa kutya wu li nokuli ontega mokati kuundingosho mpoka.Ehokololo otali ti kutya ongulohi ndjoka, manga ye li puundingosho mpoka nookastoma dhawo, pu yo opwe ya omushiwikile gwomusamane, ngoka a pe Amukoto oodola dha Namibia omulongo (N$10), ta ti odhawo ayehe na Kondjeni ya landele mo ookastoma dhawo adhihe dhi li nayo mpoka, otombo. Amukoto okwa fa nee a kala ina hala okupa mo Kondjeni oshipambu, ano oshendja ye. Kondjeni okwa tameke nee ta pula ko oshitopolwa she koshimaliwa shoka, a gandje omalovu kookastoma dhe, ashike Amukoto aniwa okwa kala ina hala e mu pe ko oshimaliwa she shoka. Oya tameke okunyenyeta noyi ikwata nokomalutu nokuli. Amukoto okwa vulu Kondjeni oonkondo nokwe mu tula kohi noku mu ponda. Te mu dhenge nekende momutse, na Kondjeni okwa sile mpoka. Okwa ithanwa Opolisi ndjoka ye ya nokonima yekonaakono oya kwata po Amukoto nokuya naye ongula onene yeti 3 Januari 2012 noku mu patululila oshipotha shedhipago. Amukoto okwa holokele mOmpangu ya Mangestrata pOutapi meti 4 Januari 2012 . Ina pulwa a tye sha manga noshipotha she osha undulilwa komeho omolu omakonaakono gOpolisi. Otaku tiwa kutya Elenga enene Oswin Mukulu oko lya yile kEpoko meti 3 Januari 2012 li ka pulakene shoka sha ningwa ko nokulombwela oshigwana hoka shi kale mengungumano .