moHardap mwa monika omukithi gwiinyamwenyo

IINAMWENYO pofaalama ya yimwe moshitopolwa sha Hardap oya monika omukithi gwiinamwenyo, ngoka hagu vulu wo aniwa okukwata aantu.

Ndohotola omukuluntu gwiinamwenyo gwopakathimbo, Frans Joubert, okwa ti kutya iimuna yi li 149 pofaalama mbyoka ya li ya kuthwa ombinzi ndjika (yi ka konakonwe), omwa monika obakiteri ndjika yedhina brucelosis (ndjoka hayi ithanwa wo ekulu lya Malta fever). Ofaalama ndjika oyi li ookilo 80 kuumbugantu wa Malandi.
Joubert okwa tindi okugandja edhina lyofaalama ndika, ihe okwe shi koleke kutya oyi ikalekelwa.Iikombo iheyali noonzi odha monika omukithi nguka, Joubert osho a popi. Kuyele, Joubert okwa li a lombwele The Namibian kutya omukithi nguka ogwa kwata wo aantu ye li ya hetatu haya zi pofaalama ndjika, mpoka gwa monika.
Aantu mbaka oya li aniwa ya pangwa omukithi nguka mOvenduka oshiwike sha zi ko.
Okwa ti ofaalama yimwe moshitopolwa sha Hardap, ndjoka ya li wo nayo yi ikalekelwa oshiwike sha zi ko, ngashiingeyi omukithi nguka kagu mo molwashoka ina mu monika we oshinamwenyo shi omukithi nguka. Omukithi nguka ohagu kwata unene oongombe niinamwenyo yilwe yomakondo. Ohagu kwata nee aantu uuna ya nu omahini inaga enyekwa nenge mboka ya kwatwa iipa yiimuna yi na omukithi nguka. Joubert okwa ti omakonakono oge li metifa okutala kutya omukithi nguka ogwe ya mo ngiini mofaalama ndjika.