mOhangwena tse otwiiyunganeka nawa: Shikongo ta ti

AMUSHANGA gwo RDP moshitopolwa sha Hangwena, Timoteus Shikongo, okwa ti yo yoRDP mOhangwana oyi unganeka nawa notaya longo uusiku nomutenya mokudhanga iilyo yongundu yawo, opo ya ka mone omawi ogendji lele momahogololo gOpaupresidende nOgopapralimend, ngoka taga ka ningwa pehulilo lyomumvo nguka.

Shika Shikongo okwe shi popi pethimbo a li ta taamba ko Omupresidende gwo RDP Hidipo Hamutenya kumwe naanashigongi ayehe mboka ye yile kOshigongi oshinene sho RDP pOhangwena moshitopolwa sha Hangwena meti 2 Mei 2009.
Amushanga gwoRDP moshitopolwa
Shikongo ta ti kutya oyi unganeka nawa paendondo adhihe. Tashi ti ya hogolola iilyo yokOmitiye Ompitithi yOpashitopolwa, iilyo yOkomitiye yOpashitopolwa, Aawiliki yIikandjo noshowo yOobrancha.
Shikongo ta ti kutya Oobrancha dhawo oye dhi indjipaleka okuza pOobrancha 49 nokuya pu 54 mOshitopolwa ashihe. Ota ti kutya oya hogolola wo Okakomitiye
Okagandjimayele hoka taka kala ke na uuthemba wokukala miigongi yOkomitiye Ompitithi naandjoka yOpashitopolwa.
‘Ondi uvite etumba okutseyitha mpaka kutya aaleli yoRDP moshitopowla sha Hangwena otaya longo yaa na ezimbuko omutenya nuusiku nelalakano lyokukokeka ongundu yawo yo RDP.
Oku yi monena iilyo oyindji opo yi ka mone aahogololi oyendji momahogololo ngoka twa thinda mu Novemba 2009 gOpaupresidende nogOshigongi shOpashigwana. Moshitopolwa sha Hangwena oshigwana otashi ndjoina RDP esiku kehe, nou shi wete ngoye mwene nena mpaka kengathithi enenenene ndika lye ya koshigongi shawo shika pOhangwena,’ Shikongo ta ti ngawo nokugwedha ko kutya aakalimo yomoshitopowla sha Hangwena oya dhimbulukwa kutya oye li monkalo yuuthigonam kaye na elongo li li nawa
noshowo omayakulo gopaunamiti, omayakulo gopakwatakanithokumwe kaage li
nawa noya dhimbulula wo nonkumwe onene komalaka omawinayi taga ulwa aawiliki niilyo yo RDP kaawiliki yOswapo mboka ya thiminikilwa aakwashigwana yomOshitopolwa sha Hangwena.
‘Kehe esiku otu li momashongo omanene, tatu ningilwa omatilitho notatu tukwa kAawiliki, kiilyo nokayambidhidhi yomoshitopolwa shika sha Hangwena yongundu tayi pangele. Ongoshiholelwa tala kwaashoka tashi ningilwa hailwa Dineinge Sheya
noohailwa yalwe yo RDP. Tala koontamanana ndhoka dhi li po dhomapandela gaali, lyoRDP noSwapo, ge li komuti gumwe. Mboka yoSwapo wo natango, Shikongo ta tsikile, oya li ya hala oku tu kelela tu ninge eyotho lyonyama yetu mpaka noshowo oku tu kelela tu ningile oshigongi shetu shika oshinene mpaka, mo Helao Nafidi. Otatu pandula Opolisi yetu ya Namibia sho tayi longo yaa na egamombinga. Onda hala okutya ngashiingeyi, ngashi tu li mpaka, oshigwana osha dhimbulula kutya nani
Ongundu ashike yo RDP tayi vulu oku shi kutha kondjoka yomahepeko noyomatilitho ngoka, gamwe gomugo, nda tumbula metetekelo,’Shikongo ta ti ngawo.
Okwa tsikile ko kutya esiku ndjoka lyoshigongi shawo pOhangwena mpoka, oli li esiku moka etumwalaka lyawo lya li kutya; ‘sigo oompaka, opuwo, twa loloka ngaa nee okuuhala tatu tilithwa nokuundagulwa.’ ‘Namibia okwa kala nee ngaa ethimbo ele nokulombwelwa iifundja nokuningwa elayi. Onkee nena otwe ya kumwe mpaka kutya, sigo opo mpaka, inatu hala we okuningwa nayi. Onkee okuza mpaka, tu
kiishangitheni ndele tatu ka longitha oshilwitho shetweni sha simana shopaudemokoli shoka shopena, ano shokukahogolola Omupresidende gwetu gwo RDP Hidipo Hamutenya noshowo aawiliki yetu mboka ye na oku ke tu kaleleni po mOshigongi shOpashigwana. Tu kuthe ko Epangelo kwaamboka itaya vulu we okupangela oshilongo shika noshigwana sha mo,’ Shikongo ta tumbula ngawo.
Okwa ti RDP okwa itaala mombili, ina itaala nande moondjembo dhomashina nenge moombasuka odho ngeno a longithe mokweeta elunduluko moshilongo nomoshigwana shamo.
‘Onda hala oku mu indila Oohailwa yakwetu nookuume ketu tu ulikeni Opolotika ya koka, pethimb o ndika ndele nopethimbo tuu lyiikonga yOmahogololo mbyoka tayi keya manga inatu yeni momahogololo gogene pehulilo lyomvula ndjika. Uuna taye tu hindeni, tu ya kaleni kokule notwiigamekeni komautho gongundu yetweni yo RDP ethimbo alihe. Tu kaleni tu na evuliko kaaleli yetweni notwiisimanekeni atuheni’ ‘Shikongo ta popi.
Ta ti AakwaRDP oya li ye ya lela nawa momangungu nokwe ya indile ya tsikile ngawo. Ta indile nee ka kwaRDP ayehe ye kiinyolithe opo ya mone uukalata womahogololo, ya ka vule okuhogolola momahogololo ngoka tage ya mu Novemba 2009, moka tamu ka hogololwa Omupresidende gwoshilongo noshowo iilyo yOmutumba gwOpashigwana.
Ta indile wo kukehe gumwe ngoka a hala okukala oshilyo sho RDP e kiishangithe nokumona okakalata ke kuukwashilyo pOombelewa dho RDP ndhoka dhi li popepi naye
‘Nonande nda popya unene nda ukilila Oshitopolwa sha Hangwena, kiitopolwa oyindji yilwe, shoka shi li mOhangwena osho ngaa shi li hoka wo. Oshigwana otashi ende tashi ndjoina RDP esiku kehe,’ Shikongo ta ti ngawo.