mOhangwena omu na oompumbwe odhindji:Nghaamwa ta ti

NGAVENA gwoshitopolwa sha Hangwena, ate Usko Nghaamwa, okwa ti oshitopolwa sha Hangwena oshi na oompumbwe odhindhi lela notashi ka kala oshiwanawa Ombaanga ya Sandarad Bank yi tsikile nokukwathela moshitopolwa sha Hangwena.

Shika okwe shi popi pethimbo hokolola pambelewa kutya Oshitayi shOmbaanga ya Standard pOshikango mondoolopa ya Healo Nafidi, mpoka Omukuluntuwiliki gwOmbanaga ndjika ya Standard moNamibia omusamane Mpumzi Pupuma naye opo a li.
Nghaamwa ta pandula noonkondo Ombaanga ndjika sho tayi kondjo shili nokugandja omakwathelo gi ili nogi ili moshitopolwa sha Hangwena noshowo mIitopolwa yilwe moshilongo. Ngavena
Nghaamwa ta pupula Ombaanga ndjika kombunda sho tayi tsikile nokwaandjaganeka omayakulo gawo mokati koshigwana nokweeta ngeyi eyakulo lyayo koshigwana. Ta ti oshi li naw angawo na nayi tsikile ngawo. Nghaamwa ta indile koshigwana shomoshitopowla sha Hangwena shi tsikile nokuyambidhidha Ombaanga yasho ndjika ya Standard opo yi kale ya kola noyi vule okutsikila nokukwathela oshigwana ngeyi nomayakulo gayo.
Kombinga yomakwathelo moshitopolwa she sha Hangwena, Ngavena Nghaamwa
okwa pula omusamamne Pupuma a tsikile natango nokutula omayakulo gopapungulo mondoolopa ya Helao Nafidi.Nghaamwa ta ti kutyangashi oshipangelo shEpangelo sha Eenhana osha pumbwa okukwathelwa lela moompumbwe dhasho odhindjidhindji. Gavena ta pandula aanangeshefa ayehe
yomOshikango sho yi itula mo muunangeshefa wawo nokutsikila taya yakula nawa oshigwana ngeyi moompumbwe dhasho dhesiku kehe. Omukuluntu gwoshitopolwa sha Hangwena ta indile kaaniilonga mOmbaanga ya Standard ya tsikile nokuyakula oshigwana, ano ookastoma dhawo nawa, nombili nonesimaneko.
‘Tangi unene kewiliko lyOmbaanga ya Standard sho mwa ninga Oshitayimbaanga sheni sha Standard mOshikango mu Helao Nafidi Ombaanga yuudhilila notwa tegelela natango mu ka andjaganeke omaykaulo geni moshitopolwa sha Hangwena,’ Ngavena Nghaamwata ti ngawo nokupandula Ombaanga ndjika noonkondo.
Omukuluntuwiliki gwOmbaanga ya Standard omusamane Pupuma okwa tseyitha pokati mpoka kutya Ombaanga ye ndjika ya Standard pethimbo lyIitelela netulomiilonga lyOmaulikilo gIipindi ga Eenhana pambelewa ongulohi yEtitano lya zi ko pEenhana oya gandja okapandi kOoN$100,000 kElelo lya Eenhana opo li kiikwathele nadho pethimbo lyomaulikilo galyo gOpaipindi ngoka taga ka kala ko okuza meti 26 Juni 2009 notaga ka kala ko sigo ometi 4 Juli 2009 pEenhana mpoka. Ombaanga ya Standard ya Namibia mOlyomakaya ga zi ko, oya egulula Oshitayimbaanga shayo pOnandjaba mOkalongo mOshitopolwa sha Musati. tayi gandja wo ekwatho kUuministeli wUuhaku lyOodola dha Namibia Omiliona yimwe nomayovi gomathele gatano (N$1,500,000) dhokuwapalekitha oshipangelo shEpangelo sha Shakati.
Pethimbo lyomeya gefundja nuumvo, Ombaanga oyo tuu ndjika, oya gandja Oodola dha Namibia omayovi omathele gaali (N$200,000) dhi ka kwathele oonakuhepekwa komeya gefundja. Omukuluntu gwOmbaanga ndjika mOshitopolwa sho moNooli, tate Matti Kanalelo, okwa lombwela The Namibian kutya Ombaanga yawo, oyi na oshinakugwanithwa oshinene shokukwathela oshigwana. ‘Itatu taamba ashike okuza moshigwana, ashike natse wo otwa tokola okushunitha mo sha, okuza moshiketha shetu shokukaleka po onkalonawa yoshigwana yesiku kehe,’ Kanalelo ta ti ngawo.