Model Pick & Pay a gandja N$10,000 kOseko ya Gabriel Taapopi

ONGESHEFA onene ya tseyika nawa yiilandithomwa, unene yiikuliwa, yedhina Model Pick & Pay mEtine lyoshiwike sha zi ko oya gandja omagano gOondola/N$10,000 kOseko yOpombanda ya Gabriel Taapopi nelalakano yi kiilandele ondhalate yolugumbo lwawo ndoka pethimbo ndika kalu li nawa nande.

Omukuluntusikola gwOseko yOpombanda ya Gabriel Taapopi tate Sakaria Eelu, okwa ti kutya omolu oompumbwe odhindje ye dhi na mOseko yawo moka, mwa kwatelwa ewapalekululo lyolugumbo lwondhalate lwawo, oya li ya ka konkola komiyelo dhongeshefa ndjika Model Pick & Pay nokoonkwawo, dhi ya pe omakwatho naashoka dhi na po, na Model Pick & Pay okwe ya kwatha N$10,000 dhi ka wapalekithe olugumbo lwawo lwOseko yawo.
Tate Eelu ta ti, omathimbo ga zi ko, sho ya li nOshiithanene shEhanganitho lyAanasikola ya longwa posikola mpoka kumwe naalongi ya longa pOsikola mpoka, oya li ya toto po Oshiketha shokugongelela Oseko yawo ndjoka oshimaliwa shokukandula po oompumbwe dhawo, dhi ili nodhi ili, na opo nee ya zi taya ende taya pulaapula omakwatho kaasihenda nokookuume ngeyi.
Sho ta gandja omagano ngaka gOmayovi omulongo kOmukuluntusikola gwOseko yOpombanda ya Gabriel Taapopi tate Sakaria Eelu, Omukuluntuwiliki gwa Model Pick & Pay mOshakati Efolo Hester Uushona okwa ti kutya mokugandja oshimaliwa shOondola dha Namibia omayovi omulongo kOseko ya GT, okwa hala okuulika kutya Model Pick and Pay ota
pandula noonkondo oshigwana sho sha kala noshi li tashi yambidhidha Model Pick & Pay a kale ngeyi gumwe gwomoongeshefa dha Namibia tadhi shi enitha nawa. gOtatu pandula Ookastoma dhetu adhihe, notwa hala ngeyi okuulika olupandu lwetu tashi pitile mokugandja omagano gethike mpaka gOondola/N$10,000) kOseko ya GT,opo ya katule ondhalate kolugumbo lwawo shi ka ete aanona tayi ilongo mOseko moka, ya za koombinga noombinga dhoshilongo, ya kale tayi ilongo ye li megameno, h meme Uushona ta ti ngawo.
Eelu okwa pandula noonkondo komagano ngaka. Ta ti kutya Model Pick and Pay na kulupe nomeho mayego ye mu taasinine.
Tate Eelu ta indile wo koongeshefa dhilwe noshowo koohandimwe ya landule oshiholelwa oshiwanawa shika sha Model Pick and Pay.