MoCaprivi oya pumbwa uumbautu wooindjina

OMUKULUNTUWILIKI gwOkomisi yi na sha nomayambulopo gOpashigwana/National Planning Commission (NPC), Peter Katjavivi okwa ti oshitopolwa sha Caprivi osha pumbwa uumbautu wooindjina meendelelo, u kwathele mokwaadha aantu mboka ya thigila komahala ga dhengwa kefundja.

Katjavivi, ngoka a li a kwatele komeho osheendo shaanadiplomate miitopolwa ihamano mbyoka ya hepekwa komeya gefundja, okwa li a lombwele aanankundana mOmaandaha kutya aantu ya konda po 4 000 moshitopolwa sha Caprivi, oya tetwa ko komeya gefundja komahala hoka haku monika omakwathelo ga simana.
Oyendji yomaantu mbaka inaya thiga po omagumbo gawo ya ye komahala ngoka ga londwa, molwashoka oya hala okukala ya kalela omaliko gawo ngashi iimuna. Ihe omeya gefundja oge shi ninga oshidhigu okuthika kuyo na shika otashi vulu ashike okuningwa pakulongitha uumbautu wooindjina.
Aanadiplomate oya li ya yi kiitopolwa mbika, ya ki utalele ko yoyene kutya onkalo oyi li ngiini nokutala ngele otaya vulu okukwathela.
Iitopolwa mbyoka ya gumwa kopmeya gefundja mu Namibia oyo, Oshana, Oshikoto, Omusati, Ohangwena, Caprivi na Kavango. Miitopolwa yokOwambo, aantu ye li 709.417 oya kala ya gwililwa po komeya gefundja konima yomvula onene ndjoka ya tamekele okuloka moshitopolwa shoka muule womwedhi gwa zi ko.
Ndhika odha popiwa ku Amushanga omukuluntu mUuministeli wOmapangelo gOpaitopolwa, Omagumbo nEhumithokomeho lyokOmikunda, Erastus Negonga, moshigongi she shokugandja uuyelele kombinga yonkalo gomeya gefundja moshitopowla sha Shana, shaMusati, sha Shikoto noshaHangwena shoka sha li ko mOshakati meti 18 Maalitsa 2009.
Negonga, ngoka e li wo Omuungneki mOmbelewa yokuungaunga nonkalo yomeya gefundja mOnooli, okwa ti aakalimo yomomagumbo ge li 1104, ye li 7063 sigo ometi 18 Maalitsa 2009, oya kala ya gumwa noonkondo komeya gefundja moNooli miitopolwa ayihe ine, Oshana, Omusati, Oshikoto nOhangwena, omanga yomuyo ye li 4480 ya li ye na okulundululwa po pomahala gawo nokufalwa hoka taya vulu okukala manga. Oondjila dhi li 27 odha kala itadhi vulu we okweendwa.
Oosikola dhi li 808 odha kala dha gumwa nayi komeya gefundja omanga 219 dhomudho dha li dhi na okupata. Aalongwa ye li 99 670 oya li ya gumwa konkalo yomeya gefundja ngaka. Oshipangelo shimwe (Engela) osha li sha tetwa ko ombinga yimwe naantu yokombinga ndjoka ya li ya tetwa ko kaya li taya vulu okuya ko we koshipangelo shoka, unene tuu mboka yokuuninginino washo.
Ooklinika dhi li 19 odha li dha tetwa ko komeya gefundja nomahala ge li 70 okwa li itaku vulu we nande nande okwiiwa kwali. Shi na sha nomukithi gwOkolera, tate Negonga okwa ti kutya sigo oompaka nuumvo mIitopolwa ya tumbulwa pombanda inamu lopotwa omukithi gwoKolera na kamu na omuntu a lopotwa a sa komukuthi nguka. Ashike nee tate Negonga ta ti, Omalaria mIitopolwa mbyoka oge li mo taga dhana onkandangala noonkondo.
Tate Negonga ta ti sigo oompaka miitopolwa ayihe mbyoka omwa lopotwa nale aantu ye li 7942 ya kwatwa kOmalaria. Ye li 2363 yomuyo osha kolekwa lela komakonaakono gokoLabora kutya oye na omalaria. Sigo oompaka oga dhipaga mo nale aakwashigwana ye li 25, noyendji yomuyo, ye li 14 oyomOshitopolwa sha Musati.
Nonando inashi yela mo nawa kwali okuzilila kOlopota ndjoka ya pewa Negonga kOpolisi kombinga yaakwashigwana mboka ya sa omeya muule wethimbo lyomvula tayi loko, ano okuza mu Desemba 2008 sigo ometi 18 Maalitsa 2009, otashi vulika omwaalu gwaakwashigwana mboka ya sa omeya okuza mu Desemba 2008 sigo ometi 18 Maalitsa 2009, ya kale ye li 105.
Negonga okwa ti kutya pa lopota ndjoka a pewa kOpolisi omwaalu gwoonakusa otashi vulika tagu ihilile pomwaalu ngoka gwaantu ye li 105 sigo ometi 18 Maalitsa 2009.
Kombinga yaantu mboka ya lundululwa pomahala gawo,Negonga okwa ti kutya sigo ometi 18 Maalitsa 2009, mOsenda ya Shoopala mOshakati mOshitopolwa sha Shana omwa kala mu na aantu ye li 1517, mEkuku mOshana tuu moka tamu kala ye li 617 nomOshakatiuninginino tamu kala ye 87.