Mo Nooli ya landa iitungitho

AANIILONGA oyendji moNooli, efudho lyOkrisimesa kalya li ashike efudho lyokumwena nokutyapula, ihe olya li wo ethimbo lyawo lyokulanda nokutunga omagumbo, oondingosho nOositola dhawo momikunda dhawo moka.

Omunangeshefa a tseyika nawa gwOositola dhIitungitho moNooli, unene mOshakati, Erastus Shapumbwa nenge Chicco, okwa lombwela The Namibian kutya kuye osha li oshikumithi sho aakwashigwana oyendji okuuka pehulilo lyomvula yayi 2011, ya kala taya mbombolokele poositola dhe dhIitungitho nokulanda iitungitho noonkondo, unene tuu ngashi oosamande, Iipeleki, oopaala, omiyelo, iipilangi, oondhalate, oopainda, ominino dhomeya nosho tuu, uutololi, iihupulo, oombike, omakuya, omakatana, omalima nosho tuu, omanga aalimimapya ya kala taya landa wo iipululo noshowo iikwaipululo yomaludhi gi ili nogi ili.Shapumba ota ti kutya, osha fa shi li ngeyi kutya sho Epangelo lya ti inakukewa we omiti, omagumbo ogendji gomiti ngoka ga kala po nale oga tameke okukwisha nokuyonuuka. Iiti ya tameke tayi kulupa nosho tuu noya pumbwa nee okupingenwa po ngeno. Ashike nee omolwiiti itayi kewa we, oshigwana osha pilukile mokutunga pashinanena. Ano okutunga oongulu dhoodhopi niipeleki. Onkee ano taya landa noonkondo iitungitho yawo ya ka tunge omagumbo gawo ngawo nosho tuu. Shapumba ota ti kutya, omolu aantu oyendji ya kala taya mbombolokele kOositola dhe, unene mOshakati, naye okwiikwatele ko ye mwene kokulanditha, opo ookastoma dhe dhi yakulwe meendelelo nokuya. Ta ti sha zi mpoka sho a kundana yamwe taya nyenyeta komikweyo. ‘Itandi vulu okukala ashike nda mwena, Ookastoma dhandje dha pumbwa okuwatelwa meendelelo. Onkee ondiikutha ngaye mwene ndi kiikwatele ko mwene keyakulo lyookastoma dhandje. Onda hala mpoka inatu shi enditha nawa mu tu dhimine po, nonda hala nokuhalelela mu tu pe omayele meyakulo lyetu,’ tate Shapumba (Chicco) ta lombwele nokwiindila kookastoma dhe ngawo. Chicco ta ti wo kutya okwa ningi kehe shoka ta vulu opo a kuthile ko ookastoma dhe kiitungitho oyindji mbyoka ya kala taya landa pongeshefa ye mpoka. Ta ti ota tsikile ngaka noku shi ninga okuuka komeho hoka. ‘ Elalakano lyandje okugandja eyakulo li li nawa kOokastoma dhandje, oshoka odho aahona yandje kumwe naaniilonga yandje moongeshefa dhandje moka. Onkee otatu ka kembadhala tu dhi pe omayakulo ge li nawa notaga uvitha ombili,’ Shapumba ta ti ngawo. Omanga ta hingi ye mwene Okapokalefa ke pongeshefa ye onene yomOshakati.