Misa a indile epangelo li kuthepo oondjikila dhoThe Namibian

EHANGANO lyiikundaneki lyUumbugantu wa Afrika (MISA) olya indile epangelo lya Namibia opo li hulithe po eindiko lyoomvula 8 ndyoka lya keelele opo li tule omatseyitho moshifo shika noshowo okulanda oshifo shika niimaliwa yaa futi yiifendela.

Mo 2001 oKabinete oka ningile etokolo kutya epangelo ina li ninga we omatseyitho galyo moshifo shoka lyo ina li landa we oshifo shoka,molwaasho osha talika hashi konenene unene epangelo noshowo ongundu ta yi pangele mokushanga kwasho.’Ekeelelo ndika ota li ulike kutya moNamibia ka mu na eidhidhimikilathano, na ota mu humithwa natango komeho onkalo yokwiikalekelwa, ndjoka aaNamibia ya ekelehi pethimbo lyemanguluko,’omuwiliki gwa Misa gwopashitopolwa Kaitira Kandjii a ti momushangwa metitatu.Okwa ti omasiku ngaka oshifo shika osha ulike uuntu washo, sho sha zimine okutula uuyelele wu na sha nomahogololo mushimwe shomiifo yasho yesiku itaa shi pula ofuto nando oya sha, konima sho Okomisi yomahogololo ya ti ,ita yi vulu okushilongitha omolwa eekelelo ndika lyomumvo 2001.’Oku tala epopyo kutya okomisi yomahogololo ina yi vula okulongitha oshifo shika omolwa ekeelelo, ota shi ulike nkene oshinima shika shi na enwethemo nokomalutu gamwe gopashigwana moNamibia.Misa okwa endulula ekankameno lye kutya ekeelelo olyo eyonagulo lyiikundaneki noshowo lyemanguluko lyokupopya, oshoka elalakano lya lyo oku thiminika oshifo shika opo shi nyole iishangwa ta yi popi nawa aapangeli,’Kandjii ta ti.Okwa ti shimwe shomiinakugwanithwa yiikundaneki osho okukonenena nokupula omapulo gakola kaaleli opo ya vule oku kala ye na oshinakugwanithwa ngele ta ya longo niikumungu yoshigwana.Pa ye,aakwanepangelo oye na okwiilongekidhila, okutalwa nomeho omanene noyena okukala ya tegelela ya pewe uusama oshoka shika osho oshikalimo shuudemokoli wu na omwenyo.’Misa okwa itaala kutya eekelelo ndika olyo eshundulo lyuukwatya wuudemokoli waNamibia. Ekeelelo ndika ota li kondjitha onkalo kutya iilonga yepangelo ota yi longwa peha lyaakwashigwana, no The Namibian oshitopolwa shoshigwana , shoka ha shi longo iilonga yasho yoku tseyithila aakwashigwana kombinga yehumokomeho, ‘ omushangwa ta gu tsikile.Ehangano ndika olya ti ekeelelo ndika ka li li pamulandu guudemokoli na olya eta etopoko moshigwana noshowo mokati kiikundaneki.’Sho oshilongo shuuka momahogololo, oshi li mondjila okutya oku kalekapo ekeelelo ndika otashi ningilwa owina oku tindila aakwashigwana yamwe ya mone uuyelele, naa shika ita shi kala oshiwanawa komahogololo oshoka kapena uuthike pamwe.Ngele epangelo olyi itulamo okunkondopeka uudemokoli, noshowo omahogololo gamanguluka nogeli pa yuuki nena oshaanawa oku kutha po ekeelelo ndika,’ Kandjii ta ti.