Minista Angula a konaakona oondjila mOhangwena

OMINISTA yIilonga nIiyenditho Helmut Angula okwa ti kutya okwa pandula kiilonga yetungo lyoontopa mopate ya Engela-Okalongo-Outapi.

Shika okwa li e shi popi pethimbo a li a ta talele etungo lyoopate noontopa mondila ndjika oshiwike sha zi ko.
Kepulo komutoolinkundana kutya otati ngiini kombinga yiilonga yomatungo moopate pomahala ngoka a talela, Angula okwa yamukula kutya okwa nyanyukilwa iilonga mbika.
‘Ngele ota tu tala omutungile gwevi mOhangwena, evi lyehekevi olya pumbwa iitungitho yoopate yakola mbjoka ihayi monika moshitopolwa shika. Iitungitho ya kola ohayi monika kiitopolwa ngaashi yaKunene, onkee nee ongushu yiilonga nda mona otayi monika yili nawa,’ Minista Angula ta tumbula.
Shika okweshi popi iikolelela kuule woontopa, uukolele wontopa noku tala iitungitho ya longithwa.Angula okwali a talelepo oontopa oompe tadhi tungwa moshitopolwa moka a
tala woo uukolele wadho nokukuthilwako woo kaatungi yadho.
Ethimbo a kankama okutala ontopa tayi tunga pOshana shaNambango momukunda Ohaingu, Angula okwali a tala nkene ontopa ya tungwa nonkee ya tulwa omitungilo dhokungambeka ondapo yosheenditho.
Okwa talelepo wo ontopa tayi tungwa pOnakaolo mpoka a adha aaniilonga yi ipyakidhila nokulonga uulonga uushona omanga inaya mana okutunga.
Omitungilo dhokungambeka ondapo kiiyenditho odha kala nokunyenyetwa kaalongithindjila oyendji, moka ya holola kutya otadhi teya iihauto yawo ngele omuhingi ngoka ina tseya kutya opu na omangambeko gondapo okwiidhenge mugo, ina kulula ondapo yosheenditho.
Angula okwi okuwete wo kutya opwa pumbwa okutulwa omadhidhiliko taga ulike kutya okuna omangambekondapo komeho, ashike omadhidhiliko ngaka oga pumbwa okutulwa oshinano shili kokule kashona noontopa.
Angula okwa tumbula kutya, iiponga moNamibia olundji ihayi holoka omolwa uushona woondjila nenge omadhidhiliko gaali pomahala gamwe omawinayi, ashike omolu oopate dha longwa nawa dhoka tadhi tsu omukumo aantu ya hinge taya hingilile ondapo yi li pombanda noonkondo. Okwa ti aantu oya pumbwa okwiilonga okuhinga ondapo yili pevi moondjila dhaayehe.
Minista Angula okwa popi kutya opo oondjila dhi kalekwe monkalo ombwanawa, oopate odha pumbwa okukala kadhi opalekwa opo tadhi kala noku longitha uule wethimbo ele.
Osheendo sha Minista okwa li wo sha telelepo ehala mpoka tapu katungwa Osasiona yolutenda, ehala mpoka tapu katungwa endiki lyUuministeli wEgameno lyOshilongo noshowo ehala lyokutulila omaloli goondongelwa.