Minista Abraham Iyambo a talela po oshigongi shaalongi mOshana

OMINISTA yElongo Omundohotola Abraham Iyambo, ngoka a kala noku li natango mefudho lyuuwehame, konima sho a longo noonkondo nonuudhiginini omvula ya zi ko, ota ti po hwepo nokwa li nokuli a talele po Oshitopolwa sha Shana oshiwike sha zi ko, nokwiiyakela mOshigongi oshinene shAakuluntusikola nAanambelewa yElongo moNamibia shoka sha li sha ningilwa mOngwediva mEtitano lyoshiwike sha zi ko, shoka sha li sha popithwa kOministeli yOpevi yElongo Omundohotola David Namwandi noku Gavena yOshitopolwa sha Shana Klemens Kashuupulwa.

Minista Iiyambo, konima ashike yeipyakidhilo enene niinima yElongo omvula ya zi ko moka a kala ta ningi iigongi oyindjiyindji yokutsa omukumo Aanashilonga ayehe mElongo lyoshigwana shokomongula, mwa kwatelwa naavali noshowo konima yOshigongi oshinene shElongo sha ningilwe mOvenduka, okwa tameke okukala kiiyuvite nawa nokwa taambelwa mOshipangelo sha Katoolika mOvenduka. Okuza mpoka okwa pewa nee efudho ele, opo a kale nawa lela, a vule ishewe okutsikila niilonga ye yElongo moNamibia. Opwa kala omaipulo kutya sho a pewa efudho ele ngawo, ke uvite nawa. Manga nee e li mefudho ele ngawo, naantu tayi ipula kutya ke li shapo nawa, okwa ka monika ashike ti iyakele pomahala gomagongalelo, ano giigongi yElongo mpaka naampeyaka, unene tuu koShiwakopo nosho tuu. Omanga nee ye li moshigongi shawo taya kundathana Elongo mOsenda yIikwaipindi mOngwediva mEtitano lya zi ko, Minista yOpevi yElongo Omundohotola Namwandi noshowo Gavena ya Shana Klemens Kashuupulwa nAaendithi yElongo ayehe moNamibia ya li moshigongi moka, oye wete ashike sho Ominista yElongo Omundohotola, Abraham Iyambo a mbanduka ko, ta ende oshimati, ta minike aanashigongi nomaako ge li pombanda. Ta hambelewa nokutaambwa ko kOminista ye yopevi Namwandi nokuGavena ya Shana Kashuupulwa nokwaayehe ya li moshigongi moka. Omupeviminista gwElongo Omundohotola Namwandi, okwa lombwele oshigongi kutya oya pandula noonkondo Minista Iyambo sho e ya ye mwene kOshigongi shika oshinene shAawiliki ayehe yElongo mOngwediva. Ye mu mone yoyene, molwashoka ohaya uhala taye mu pula kutya oku li peni ano na oku li muukolele wu thike peni. ‘ Minista yElongo oye nee ngoka. Omu mu wete ye mwene kutya oku li nawa notwe mu tegeleleni a kale nawa nziya noku ye e tu ndjoineni meungaungo nElongo ngashi sha kala shito. Minista Iyambo otwe ku taamba notatu ku halele eeluko meendelelo nuukolele tau kalelele, ‘ Omupeviminista gwElongo Omundohotola David Namwandi ta ti ngawo manga aanashigongi taya hakele omake nokwiigidha taya ti otaya halele Minista Iyambo uukolele tau kalelele. Oyendji mOshigongi moka oya li ye shi Minista Iyambo ote ya popitha ngaa nande opaufupi, ashike Omupeviminista Namwandi okwa ti kutya, aaye ite ya popitha nena, oku li natango mefudho lyuuwehame. ‘ Tu tegeleleni ashike a kale nawa. Ota galuka note ya e tu popitheni ngashi shito,’ Omupeviminista David Namwandi ta lombwele aanashigongi ngawo nokufala Minista Iyambo kohauto ye a ye mefudho lye lyuuwehame nombili ndyoka a pewa kOmundohotola gwe.