Meme Kuna Shikongo a ninga Omundohotola mUunongononi wUupangi

OMUPANGI a tseyika nawa meme Katriina Kuna Shikongo i ilonga nuudhiginini mOshiputudhilo shoPombanda sha UNAM ndele ta mono onkatu ye yopombanda yUundohotola e yi pewa kOmupresidende Hifikepunye Pohamba noku yi kolekelwa kOmukuluntu gwa UNAM Omundohotola Sam Nujoma ngoka wo e li Omukokolipresidende gwa Namibia mEtitano lyOshiwike sha zi ko pethimbo lyOshituthi shEgandjo lyOonzapo kaailongi ya UNAM mOnooli komupresidende Hifikepunye Pohamba yo nOmukuluntu gwa UNAM Omundohotola Sam Nujoma taya yambidhidhwa kOmupevikuluntu gwa UNAM Omuprofesore Lazarus Hangula.

Meme Shikongo okwa pita Omatrika ge kOshigambo moNooli ya Namibia momumvo 1971. Ta tameke iilonga ye yUupangi momumvo 1972 moka a kala ti igwedhele ko nokwa mono Odiploma mUupangi wa Kwaalukehe noshowo Muuvalithi momumvo 1975 mOkolllegi yUupangi ya Shakati . Ta yi te kiiilongela Odipoloma muulongi wUupangi kOuniversity yoko North mo Pietersburg sha South Africa momumvo 1979. Okuza mpoka okwe kiilongela Odigree ye yi na sha nElelo lyUupangi ko University ya South Africa ndjoka amana momumvo 1985. Odigree ye yopOmbanda mElongo lyUupangi mo Academy onkulu ya Namibia okwe yi mana momumvo 1988, nOmasta Digree ye mUunongononi wUupangi te yi mana momumvo 1999 ko UNAM.
Meme Shikongo okwa kala nee Omulongi gwAapangi okuza momumvo 1980 nokwa ndjoina Oakademi momumvo 1986 ongOmulongi gwAapangi mOshitayi sha UNAM shomoNooli mOshakati sigo omomumvo 1995. Sigo onene meme Kuna Shikongo oha longo Aapangi Uusociology noha vongokonona mo nawa Elongo lyUupangilya Kwaalukehe mOshikondo shUunongononi wUupangi mOshiputudhilo sha UNAM shomoNooli mOshakati.
Eilongo lye olya kala unene te li mono okuza kOvenduka, kOnandjokwe nomOshakati kohi yetonatelo lyOmuprofesore Agnes van Dyk nOmuprofesore Louis F. Small gwOuniversity ya Namibia.
Omupresidende Hifikepunye Pohamba noshowo Omukuluntu gwa UNAM Omundohotola Sam Nujoma nOmupeha gwe Omuprofesore Lazarus Hangula noshowo Ooprofa dhilwe, Oondohotola dhOoFrans Aupa Indongo, Oondohotola dhOoKleopas Dumeni, iilyo yEwiliko lya UNAM noshowo aanenentu ya li mOshituthi shoka mEtitano lya zi ko mOngwediva, mwa kwatelwa Omusamane gwe tate John Shikongo noyana yawo, ookuume naakwanezimo noonakupewa oonzapo dhilwe pamwe naye, oya halele Omundohotola omupe mUupangi nguka meme Kuna Shikongo omayambeko nompolo Ombwanawa miilonga ye.
Meme Kuna Shikongo, oye gwotango ta mono onkatu yuundohotola okuzilila mOshitayi sha UNAM shomoNooli mOshakati noyendji oye mu pandula noonkondo mwaashika.