Meekulu Nandjaba ya Heelu a dhana evalo lye lyoomvula 105

OMUKULUPE Meekulu Ndatyoonawa Nandjaba Rauna yaHeelu gwomomukundaEhafo popepi nOmutemo mOukwanyama mOshitopolwa sha Shana mOlyomakaya ga zi ko geti 16 Mei 2009 okwa dhana oshituthivalo she shoomvula 105).

Sha ningilwa pegumbo lye noshitenya she tate Jason Mapove momukunda Ehafo moka, shoka sha li sha wilikwa koshitenya she meme Beatha Haufiku ta yambidhidhwa komusamane gwe tate Josef Mbwiti Haufiku ngoka e li onkelo ya meekulu Nandjaba yaHeelu, noshowo komonakadhona gwa waHeelu, meme Josephina Hamukwaya.
Oshituthivalo sha meekulu waHeelu shika osha li sha kalwa koyana, kaatekulu, kuutekulu noshowo kaakwanezimo, kookuume nookahewa ya za koombinga nombinga dha Namibia unene tuu moNooli. Elenga enene lyOshikandjo shUulenga sha Namutai tatekulu Amon Shipanga nOmalenga ge naye opo a li poshituthivalo sha meekulu waHeelu mpoka, oshoka meekulu waHeelu nguka okwa valwa mezimo lyAakwaniilwa, ano lyAaleli
yOpamuthigululwakalo.
Ondjokonona ya meekulu waHeelu, osha etwa ko kOmundjokononi a simana, tate Vilho Shilongo ngoka a ti kutya meekulu Nandjaba yaHeelu okwa valelwa momukunda Eengwena da Ndakolonghoshi popepi nOmufituwanakashole meti 16 Mei 1904.Meme Helena Eliander Mwatala oye a eta po oshipopiwa shekwatakanithokumwe lyezimo/epata lya meekulu waHeelu nkee li li na nkee lya tya, e shi ningi nawa unene nosha fuula mboka ya li mpoka noonkondo.
Okatekulu ka meekulu waHeelu, ano Rachel yaShatilwe–Namutima Wafemanya, oye a eta po oshipopiwa shaatekulu e shi ningi pakateyo nosha li oshiwanwa noonkondo. Ta ti ‘Hambelela nyokokulu ngeno nyoko ina dalwa,’. Mbushe ya meekulu Nandjaba Rauna yaHeelu, ano Rauna Kamutufe, ta eta po oshipopiwa shoombushe, pehala lya Rauna Salomo
na Rauna Kamutufe, konima sho meme Loide Hatutale, a gandja ompito ndjoka yokukwata oombushe mbaka yatatu ya li po noya zalekwa omizalo dhopamuthigululwakalo dhoopala nawa.
Aapopi ayehe mbaka sho taya eta po iipopiwa yawo, meekulu waHeelu, ngoka a kala ta yambidhidhwa ku meme Martha Nghimwenavali yo na meme Olivia Kamutufe, ye omutekulu gwe meme Maggy Thomas , e ya li ngaa kombinga, okwa kala e li moshipundi she mOthaila onene moka mwa ningilwa oshituthivalo she, a mwena thilu, ye ta yolo mo ngaa mpoka e wete pwa thengwa nawa.
Nonande e na oomvula dhi thike mpoka, ke shi we okweenda nawa, oshoka nomothaila moka okwa etwa mo a humbatwa koomeme yookahewa ke, aamwayina naatekulu, meekulu Rauna ota ulike a kola nokwa dhama meitaalo lye ongOmukriste lela. A pulakena nawa sho taku tiwa kutya okwa shashelwa koSt Mary Odibo kOmukwambepo Lukas Ndakalako.
Oshituthithivalo sha meekulu Rauna osha li sha longekidhwa nawa lela.
Sha li oshiwanawa lela nosha fuula ayehe mboka ya li mpoka. Unene mwene gwoshituthi, ano meekulu waHeelu, kumwe ngaa nee naayehe ya li mpoka, oya fuulwa unenenene kOngundu yUudhano yOomeme yOpamuthigululwakalo yokOndjondjo, mboka ya nyenyepeke Oshituthivalo sha meekulu waHeelu noonkondo niihimbo noniidhano yawo. Ongundulwiimbo ya Mutemo nayo wo oya eta po omaimbilo gawo gOpakriste ngoka wo nago ga nyenyepeke oshituthi shika nawa lela.
Meme Maggy Thomas okwa yambidhidha tate gwe Thomas ya Kamutufe mokugandja omapandulo noya pandula ayehe ye yile koshituthivalo shameekulu gwawo naayehe mboka ye shi longekidha noshowo mboka ya gandja po sha opo shi vule okuningwa. Opwa li wo pwa umbwa ongalo onene ya meekulu waHeelu.
Aanona, ano uutekulu wa meekulu waHeelu, owa kala wa kundukidha oshikuki oshinene shevalo lya meekulu/kuku gwawo mpoka, kehe gumwe a hala okupewa ko okapambu nenge oshipambu. Ngashi osho shili omukalondjigilile gwOoitaali, Oshituthivalo sha Meekulu Nandjaba Rauna waHeelu osha li sha egululwa negalikano nokupatwa wo negalikano
kAakuluntu yEgongalo lyOngeleka ya Anglikana lya Fululula nokuza mpoka osha ka tyapulwa nee nawa megumbo ngashi sha li sha longekidhwa nawa lela ku tate Mbwiti naanegumbo lya tate Jason Mapove moka nosho tuu.