Medhiladhilo lyokutula Ootaxi olwaala lumwe mwa ya opolitika

AAHINGI yOotaxi moshitopolwa sha Shana ya li ya ningi oshigongi pOkandjengedi mOshakati Olyomakaya ga ziko, ya kundathane kombinga yedhiladhila lyokutula Ootaxi olwaala lumwe.

Aahingi yOotaxi mbaka oya popi kutya yo oshinima shika ina ye shi hala molwashoka oya yakelwa ko kutya opu na opulanda yomeholamo lyokuninga ooyene yOotaxi mboka taya ka ninga omaindilo goonomola (dhOotaxi dhawo dho tadhi tulwa nee olwaala lwOotaxi) iilyo yo Rally for Democracy and Progress (RDP), pwaa na oku shi tseya nenge ezimino.
Oya nyenyeta wo kutya oya kala nokwiindila elelo lyawo moshitopolwa sha Shana opo li kundathane nayo moshinima shika, ashike sigo onene inali shi ninga.
‘Otwa tokola tu ninge oshigongi shika molwaashoka Elelo lyetu inali hala oku tu pulakena.
Ota tu shanga omukandanyenyeto tatu gu gandja kukOmufala gwOpolisi yaShana nosho wo kOmupresidente gwEhangano lyOombesa nOotaxi mu Namibia/Namibia Bus and Taxi Association (Nabta) a yamukule koshinima shika Ihe manga twa tegelela eyamukulo mu shika, oshinima shokudhidhilika Ootaxi nashi thikame manga sigo ayihe ya yelithwa,’ aahingi yOotaxi taya popi ngaaka.
Oya tokola wo oku na ninga ekanka ngele inaya mona eyamukulo ye li panda okuza ku Nabta. Omupresidende gwa Nabta Magnus Nangombe, okwa yembe omapopyo, ta tai, kage na oshili.
‘Mu Nabta ihatu tula mumwe iilonga nopolitika. Kandi wete mu na elalakano lyokuninga aantu iilyo yo RDP mu shika. Ngele opu na ngoka eshi shi ne ye puuyelele,’ Nangombe ta popi ngaaka.
Okwa yelitha kutya ye paumwene, kali mo miigongi ya li tayi kundathana oshinima shika mOnooli, ihe okwa li ashike a lombwelwa aanuutekisa oya nyanyukila edhilaadhilo ndika niilonga yoku tulako omayala otayi tameke.
‘Aantu mboka ya kwetele komeho edhilaadhilo ndika, aantu ye na Ootaxi kadhi li paveta na oya hala okukala ya holamena muyakwawo.
Otashi piti ngiini oku tula aantu mo RDP ngele omalelo go Nabta kiitopolwa oge na aantu yoongundu nomaitaalo ga yooloka?,’ Nangombe ta pula ngaaka. Okwa tumbula kutya mboka taya popi omafeekelo ngaka oyo y ena omadhilaadhilo gopolitika, ihe haawiliki ya Nabta.
Nangombe okuukitha omanyenyeto ngaka komuluntu gwehangano lyAanuutekisa nUumbesa mOshitopola sha Shana, meme Helena Shiimbi ngoka a tindi woo omafeekelo ngaka. Ayehe oyi indile ngoka ena uuyelele mwaashika a holoke puuyelele ihe haku holamo koshi yiinima yopolitika.
‘Inandi tseya oshinima shoka shoku tula aantu mo RDP nongele opo shili inandi shi tseya woo. Mpaka otatu kambadhala owala okuyoolola iihauto tayi longo pampango naambyoka yaali pampango’, Shiimbi tati ngaawo.
Sigo oompaka otwa pewa uuyelele kutya iiyenditho yi thike 61 oya dhidhilikwa nale. Iihauto mOshana otayi dhilikwa nuulaima uumbulau pombanda, pokati uutiligane nuushunga pevi wa taakana osheenditho.