Me Julia Shikongo oye natango Meya gwondoolopa ya Eenhana

SHO yi ihogololele pomahala gIilonga mEelolo lyondoolopa ya Eenha meti 13 Mei 2009, Elelo lyondoolopa ndjoka ya Eenhana, olya hogululula Kaansela Julia Shikongo oye natango a kale oye Omunashipundi gwElelo lya Eenhana noshowo a kale natango Meya gwOndoolopa ndjoka muule woomwedhi omulongonambali tadhi landula.

Elelo olya hogolulula wo Kaansela Paulus Mwandingi oye ngaa natango a kale Omunashipundi gwOpevi gwElelo lya Eenhana noshowo Meya gwOpevi gwondoolopa ya Eenhana. Kaansela Leonard Jona naye okwa hogolululwa a kale natnago Omunashipundi gwOkomitiye ndjoka tayi enditha iilonga mondoolopa ndjoka ya Eenhana nomupeha gwe oye Kaansela Ester Kavela noshilyo shOkomitiye ndjika sha gwedhwa po osho Kaansela William Shatimwene.
Kaansela Abed Munenguni na Kaansela Eunike Shonena oye li iilyo ya gwedhwa po mOkaansela yondoolopa ya Eenhana.Pethimbo ta taamba ko oshinakugwanithwa she natango ongOmunashipundi gwElelo lya Eenhana noshowo Ameya gwondoolopa ndjoka ya Eenhana, okwa pandula iilyuo yElelo lya Eenhana sho ye na natango einekelo mu ye a tsikile noku li wilika noshowo okuwilika ondoolopa ya Eenhana.
Ta ti mewiliko li li ngeyi omu na omashongo ogendji nomanene, ashike okwa itaala kutya ngele a yehe oyi imanga kumwe nokulongela kumwe mokuyakula oshigwana shomEenhana nena omashongo nomaudhigu ngoka itaga ka kala po, otaga ka vula okukandulwa po. Meya Shikongo ta lombwele Elelo lye kutya
Eenhana ondoolopa ogundjuka opo tayi ende tayi koko.
Tayi koko tayi endelele ashike opu na omashongo omanene ngashi ngoka gokuwapaleka nokutula iilongayakulitho momahala omape ngoka ge na okuhumithwa komeho, ngashi ngoka gokukala, goongeshefa nogOofaabulika noshowo okuwapaleka Eenhana dhi kale ondoolopa ombwanawa noshowo okutula mo omahala omawanawa gomautalelo ngoka taga hili aatalelipo, opo Eenahana shi mone oshimaliwa.
Elelo lya Eenhana, Shikongo ta ti, olya kala tali kondjo mokweeta po ayihe mbika noli li tali kondjo mukweeta po iikwawo mbyoka yi na okweetwa po natango, ashike nee ayihe mbika otayi vulu okupondoka ngele Elelo tali mono ekwatho okuzilila kwaayehe ye li kumwe nElelo ndika mokweeta po sha mondoolopa ndjika, noshigwana sha kwatelwa mo noshigwana shayo
‘mEenhana, muule woomwedhi 12 dha pita po, mewiliko lyetweni, omwa ningwa nenge omwa tungwa oshindji. Olukanda lwa Tulipwamwe olwa yelekwa nokutulwa omayakulo gopandoolopa. Nonando iilonga ayihe inayi longwa mo thiluthilu pehala mpoka, molwashoka kapu na ngaa nawa
iimaliwa, oshindji osha longwa mo lela noshi shi kupandulwa,’ Shikongo ta tin ngawo nokupandula Ehangano lyOmushigakano Omutiligane sha lya kala noli li tali kwathele moshinima shoka.
Meya Shikongo ta ti wo kutya Elelo olyi ikalekele wo oshimaliwa pooha shokutungitha Omatala omape mEenhana nootendera dhokutunga Omatala ngoka odha gandjwa nale nokuli niilonga mbika okwa tegelelwa yi ka lale ya pwa nale mu Novemba omvula ndjika 2009.
Meya Shikongo ta ti wo kutya Elelo lyaEenhana ndjoka tali lalakanene unene okuhilila aanangeshefa nAapunguli aanene kondoolopa ndjika ya Eenhana nokoshitopolwa oye shi pondola nale okweeta Oshipangelo shOpaumwene kondoolopa yEenhana.
‘Ngashi tu lyeni mpaka, omathaneko oge li metifa gokweeta oshipangelo shOpaumwene mEenhana shoka tashi ithanwa Eenhana Green Side Hospital,’ Shikongo ta ti ngawo nokugwedha po ta ti Elelo olye shi pondola wo okweeta Ohotela onene mEenhana noshowo Osenda onene yOositola ndjoka taui ka eta iilandomwa oyindji yi ili noyi ili kondoolopa ya Eenhana.