… Omeva eshi a pumba muni ota pula oshimaliwa shihapu paife
Ehangano lokundunga eebiila laNamibia ledina Namibia Breweries Limited (NBL) oli li limwe lomeengeshefa odo da hoolola okulongifa omeva omeemboola eshi omeva taa pumbu neenghono paife.
Ehangano eli paife ohali longifa eelita 4,4 doveva mokudunga ashike olita imwe yobiila.
“Konima eshi twa mona ediminino lomukanda wetu womeva okudja kelelo lodoolopa yaVenduka momafiku 10 Apilili odula ei, otwa tameka okukala itatu longifa vali omeva a muni fiyo opeepelesenda 70,” Omupopiliko wambuulaye Surihe Gaomas-Guchu osho a ti ngaho omafiku aa.
“Mbuulaye okwa kala e na elao shaashi inatu kana naana molwondilo yomeva nosho yo oinima yoshikukuta oyo ya indikwa,” Osho a ti ngaho.
Fiyo opapa, moNamibia omahangano e li 14 otaa longifa omeva omeemboola, molwomumbwe yomeva nosho yo omilandu odo da tulwa po molwoshikukuta.
Namibia okwa kala nokumona elunduluko longhalo yomhepo noshikukuta, osho sha eta pu kale puhe na omeva, oikulya ya wana nosho yo omikifi dihapu tadi uya..
Omupopiliko welelo lodoolopa laVenduka Lydia Amutenya oshivike sha dja ko okwa li a koleka kutya elelo lodoolopa yaVenduka okwa li la pitika opo eengeshefa di li 14 di ninge eemboola opo di longife omeva ado vene.
“Elelodoolopa ola yandja oufemba keengeshefa edi, opo shi vatele shi shakeneke omumbwe yomeva oyo i li po. Eyandjo lomeva inali lunduluka kovanhu vakwao oli li ngaashi la kala,” Osho a ti ngaho.
Eengeshefa odo di na eemboola dado vene ohadi mono omeva ahapu lela okudja meeboola omu kodula.
Omumbwe yomeva moshilando ohai i pombada neepelesenda 3 keshe odula.
“Odula ei, otwa teelela omumbwe yomeva moshilando i ye fiyo opeebiliyona 26 kubika mita, okuyelakanifa neelita eebiliyona 24 dodula ya dja ko,” Osho a ti ngaho.
Eloledoolopa laVenduka ohali wilike eemboola di li 36 moshilando, omo mu na eemboola di li 27 tadi longo keshe efimbo.
Eepolohalama dimwe damuni dokulwifa omumbwe yomeva omwa kwatelwa omafaneko aNamWater okukufa omunino womeva komulonga waKavango.
“Konima wa pwa okulongwa, omeva otaa ka enda momunino okudja koKavango fiyo okoGrootfontein ndee taa ka ende mokanala a yuka kondama yaMatako.
“Okudja kondama yaMatako, otaa ka pombelwa kondama yaVon Bach,” Amutenya osho a ti ngaho.
Oministili younamapya nounaimuna, omeva nomatendululo omapya oya ti otai ka andjakaneka omeva okuya keefaalama.
“Omilandu detu dipe otadi i fi yo okokutwala omeva kovanafaalama ovo ve li ovanangeshefa va fimana. Eshi osha kwatela mo okutwala ominino fiyo omeefaalama nosho yo okuninga eemboola di ya mbidide ounafaalama,” Omupopiliko wouministili Jona Musheko osho a popya ngaho oivike ivali ya pita.
Eengeshefa dishona, ngaashi ongeshefa yokukosha omatuwa yedina Okhao Investments, oya ti ova dengwa neenghono komilandu dokulongifa omeva odo da tulwa po.
“Otu li nawa shama ashike omeva etu itaa kunguluka a yuka molukanda,” Omunailonga wokukosha omatuwa Johanna Simon osho a ti ngaho.
Simon okwa ti ove na onhele omo hamu i omeva oo a longifwa, osho hashi vatele opo omeva ashune mosystema yamuni yomeva.
Pefimbo loshoongalele shoikwamina, omukulunhuwiliki wehangano loikwamina laNamibia Veston Malango okwa ti kapu na nande oupyakadi womeva koshinima osho sha teelelwa shokuninga eemina douraniuma.
“Ashike nee, pakutala nawa moshitopolwahoololo shErongo, otwa pumbwa omeva ahapu. Osino (Ehangano lokoCanada lokukonga ongopolo) otali ya. Otava ka tala unene momeva okoshi yedu, ndee ohatu popi omumbwe yomeva fiyo okoshitopolwa shaUis,” Osho a ti ngaho.
Ehangano ledina Andarada Mining, olo li na oUis Tin Mine, nalo ola pumbwa omeva ahapu, osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
