Mboka yiikuthile omahala ta ya tidhwa po mo DRC

A
KALIMO ye li 100 mboka yi ikuthile omahala kuyo yene polukanda lwa DRC kuumbangalantu-zilo wehala ndyoka lyolukanda lwiipeleki mo Swakopmund oya londodhwa ya teyepo omagumbo nokuthigapo ehala ndyoka ngele hasho ota ya kuthwapo koonkondo.

Omukuluntu gwopolisi mErongo, Komufala, Festus Shilongo okwa indilwa komukuluntu gwoashilando sha Shiwakopo opo a tseyithile aantu mboka etokolo lyewiliko lyoshilando shoka. Shilongo okwa ti yo ita ya kwata aantu mbaka, ndele ota ye ya londodha ashike kutya yo oye li pehala ndyoka shaa li paveta, onkene oye na oku kuthapo iipeleki yawo noku zapo mpoka.Shilongo okwa ti ngele mbaka ina ya yamukula kelombwelo ndika nena ota ya ka taalela oshilanduli. Oshoka yo oya teya oveta, onkene ngele ita yiinyenge ku yoyene nena oye na oku kuthwapo, opo ngele muni okwa gandja elombwelo nena opolisi ota yi ka thikama opo yi tule elombwelo ndyoka miilonga. Opwa ningi omasiku pena oontamanana, oshoka aantu oyendji oya tameke okutunga omagumbo gawo giipeleki popepi no DRC, pomahala mpoka inaa ya pitikwa ya tungepo.Oshigongi mpoka muni naakalimo yomahala ngoka ya li ya tsakanene, ina ya adha etsokumwe oshoka aanamagumbo mboka ina ya vula oku uvako kutya epuko ndyoka ya ningi oli nipo.Oya ti yo kaye na omahala mpoka ta ya yi , ishewe ina ya pitikwa oku tunga omagumbo gawo momalugumbo ga yakwawo. Miigongi mbyoka ya ka landulako aanamagumbo mbaka oya li ya ti ka ye na mpoka ta ya uka no ita ya ka zapo mpoka omanga inaa pa monikwa eyamukulo kutya ota ya ukithwa peni.