Mboka ya li moshiponga shondhila Osoondaha ya tseyithwa

OMADHINA gaantu yatatu mboka ya si sho ondhila yawo ya ongotele pevi konima yokutuka po pokapale koondhila ka Eros moVenduka oga tseyithwa.

Opolisi ya Namibia oya ti mboka ya sile moshiponga shika oyo omuhingindhila omukwashigwana gwa South Africa, Dhaven Kisten Govender[42], naafaalelwa yaali Christian Heinz Schubert[48], na Gernot Zimmermann[19] mbaka ayehe aaNamibia. Etseyitho ndika olya gandjwa komupoliko gwopolisi, omunambelewa Kauna Shikwambi.Omufaalelwa omutitatu ngoka a ehamekwa unene moshiponga okwa tseyithwa kutya oye, Immanuel Hilukilwa, na oku li natango ta pangwa moshipangelo moVenduka.Osheeti shegwomombanda lyondhila ndjika otashi konakonwa koshikondo shokukonakona iiponga yoondhila mUuministeli Wiiyenditho Niilonga.Oshiponga shika osha ningwa ongula yoSoondaha lwopotundi onti 06h58 sho ondhila ndjoka ya ndhindhilikwa moSouth Africa yoludhi lwo Cessna Grand Caravan ya tuka po, pokapale ka Eros mondjila okuya kOndjiva muumbugantu wAngola.Kakele komuhingi naafaalelwa ye yane ondhila oya li woo ya longelwa oondongelwa dhiinima ngaashi oopainda, iitungithi noshowo iikulya.Omupopiliko gUuministeli Wiilonga noshowo wIiyenditho, Julius Ngweda okwa hokolola kutya konima sho ondhila ya tuka pokapale omuhingi ndhila okwa tseyitha kutya oku na uudhigu oku yi kaleka mombanda.Ondhila oya goyoka okuuka kolulyo nokugwila pevi mehalandjandja li li pokati ka Prosperita na Cimbembasia kuumbugantu wokapale ka Eros.Oshiponga shika osho shotango tashi dhipaga aantu muule woomwedhi 14 moNamibia, oku za nkene omuntu gumwe a sile moshiponga shondhila mu September 2008. Mushika ondhila yoludhi lwo Cessna 210 ya li ya humbata aafaalelwa aaSwiss ye li yatano, oya li ya thiminikwa yi nambele mepandaanda limwe moHochland moVenduka.