Mboka ta ya longo kashona ita ya ka pewa iilonga

EHANGANO kehe lyokutunga ndyoka lya nyengwa okugandja oongulu dhosikola kuuministeli Welongo pethimbo ota li ka geelwa sho itaa li ka pewa we iilonga kuuministeli mboka monakuyiwa.

Elondodho ndika olya gandjwa lominista yopevi Yelongo, David Namwandi pethimbo a li a talelepo iilonga yomatungo goongulu dhenongelo moshitopolwa shaMaheke oshiwike shayi. Namwandi okwa talelepo omanongelo mpoka tapa tungwa oongulu dha gwedhwapo, okwa li a ende pamwe nomuwiliki gwelongo moshitopolwa shoka, Natalia /Goagoseb noshowo omutaleli gwiilonga a za kUuministeli Wiilonga. Okwa dhimbulutha aatungi kutya ye okwa hala iilonga ta yi longwa na ina tegelela omaipopilo gaa shi kupulakenwa. Okwa tsikile ta ti ye okwa pumbwa oongulu ndhoka opo aalongwa ya longelwemo, naandhika odha pumbiwa omanga omwedhi nguka inaagu sa. Omanongelo moshilongo ashihe otaga eguluka omaandaha oshiwike shika. Omuwiliki gwiilongamehangano lya Beu Construction, Rocky Murangi okwa hokololele Namwandi nkene taya longo nopomuthika mpoka yeli niilonga yetungo lyoongulu, nomashongo ngoka ehangano lya tsakaneke pethimbo lyefudho lya Krismesa, manga taya tungu oongulu ne posikola ya Khoandabes. Murangi okwa ti omvula oya piyaganeke iilonga yawo, onkene itaa ya vulu okumanitha mbika omanga omaandaha inaa ga thika. Kombinga onkwawo mwene gwehangano lya ARC Construction, ndyoka ta li tungu oongulu nongelo ndatu posikola Epako High, Cassie Hengari okwa lombwele Namwandi kutya aagandji yiitungi oyendji oya li ya pata pethimbo lyefudho lyoKrisimesa omanga omvula noshowo uupyakadhi womalusheno we ya kateke mokulonga iilonga yawo opo ya mane mesiku ndyoka ya li ya tegelelwa okumana.Omahangano ngaka oga zimine opo ga manithe iilonga mbika pehulilo lyomwedhi nguka nokugandja oongulu ndhoka kepangelo. Namwandi okwa dhimbulutha omahangano ngaka ga longe iilonga yago nawa no yi na ongushu.Okwa ti mokutala ashihe shoka sha longwa okwa li a fuuka, oshoka opuna eyokomeho. Nokwa ti omahangano naga longe nawa noneitulemo omolwaashokaoongulu ndhika odha pumbiwa noonkondo.