Matti ya Dumeni a hulitha ombaadhilila

OMONAMATI gwOmumbiishofi tatekulu Kleopas Dumeni, ano Matti Dumeni a tseyika nawa nedhina Duma, okwa manene oondjenda dhe ombaadhilila megumbo lya mumwayinakadhona Kristi Nampa Dumeni mOngwediva ongula yOlyomakaya ga zi ko.

Nonande Duma a kala a nika uuvu, sho a hulitha ngeyi okwa adhika e li hwepo lela ngeno, pegumbo lya mumwayinakadhona Nampa mpoka.
Nampa ota hokolola kutya ongulohi yokupendukila Olyomakaya moka a hulitha okwa kala kiiyuvite nawa nongula sho kwa shi okwa lombwele mumwayina Nampa nomukulukadhi gwe meme Inamvulwa Dumeni kutya otayi kashona pondje yegumbo a ka uve po ombepo.
Mokuya pondje mpoka okwa gwile po nashi meme Nampa na meme Inamvulwa ya ithanwa kaanona mboka ye mu mono sho a gwile po, ye ya mpoka, oya adha ta fudha ashike kashona.
Oya dhengele Omukuluntu gwOshipangelo shOpaumwene sha Ngwediva Omundohotola Iithete ngoka a tumu nziya Oambulansa nAapangi. Ashike, Nampa ta ti, sho ya thiki mpoka noku konaakona onkalo ya Duma, oye mu hokolola a hulitha nale.
Nakusa Matti Dumeni, ngoka a kala unene omuhingi gwoololi dhoofulaha okwa thiga ko omukulukadhi gwe mee Inamvulwa naanona ye aamati yatatu, tate gwe Omumbiishofi Kleopas Dumeni na meme gwe Aino Dumeni noshowo aamwayina yatatu Immanuel Dumeni, Kristi Nampa Dumeni na Nelson Kondaji Dumeni.
Aamwayina yatatu, ano Josia Dumeni, Leonard Nangolo Dumeni na Anna-Ndahambelela Dumeni oya adhika ye ya tetekela nale muukwaaluhe.
Matti sho a hulitha ngeyi, aakuluntu ye tate na meme Dumeni, oya adhika ye li koshigongi kOsoomi (Finland).
Nampa ota ti kutya elaka ndika lyoluhodhi oye li lombwelwa nale noye li tayi ilongekidhile okuza ko opo ku ye ku longekidhwe esiku lyefumiko lya nakusa Duma. Oshifo shetu otashi gandja omahekeleko koonakuthigwapo atuheni.