Majiedt ta pula uuyelele

O
MUFEKELWA miihokolola yekengelelo nuulingilingi wongushu yoodola oomiliona 71, Esmerelda Majiedt okwa ti ita vulu oku koleka kutya oku na mo ombinga mekano lyiimaliwa mbyoka taku tiwa okwa kanitha. Okwa popi shika mOhofa a ti oshinima ite shi tomona nawa oshoka okwa pumbwa uuyelele owundji.Okwa ti oshinima shekano lyiimaliwa okwe shi tseya ashike konima yaasho a kwatwa noku tamanekelwa oshinima shika.

Oshikwawo okwa lesha oshinima shika miikundaneki, nopethimbo a holoka mompangu.Majiedt okwa lombwele Ompangu kutya uuyuelele mboka a mono oomboka ashike a lesha oku za miifo. Okwa ti oshinima shoka osha li she mu halutha, na okwa ti omuntu oto vulu okudhiladhila kutya ngele owu na omwaalu aguhe ngoka ota shi vulika to gu longitha shike. Efekelo limwe ndyoka lya kwatitha Majiedt momasiku gane ga April nuumvo oondyoka sho aniwa a tendemo ostock yosamende yongushu yoodola oomiliona 13, tashi vulika pehulilo lyomumvogu nenge kuyele nuumvo.Sho a pulwa a koleke oshinima shika kOmutamaneki, Hans Tourob, Majiedt okwa ti ita vulu okuzimina omwaalu ngoka, oshoka okwa pumbwa uuyelele wa gwedhwapo opo a yamukule. Okwa ti ishewe iniilongekidha okuyamukula epulo ndyoka. Pethimbo lyomapulapulo mompangu metitatu osha ka monika kutya uulingilingi mbuka owa ningwa noongeshefa mbali dhoko Rundu, ya Full Properties naandjoka ya Discount Hardware. Pahapu ya gandjwa kooyene yoongeshefa ndhika, Majiedt aniwa okwe dhi tseyithile opo dhi fute oosamende dhadho niimaliwa koomuma dhe yi ukitha ku ye. Ota ku tengenekwa kutya oodola oomiliona 58 dha zi koongeshefa ndhika mbali odha yi mondjato ya Majiedt, omanga ehangano ndyoka lye mu pa iilonga lya AfriSam Cement inaa li mona po sha. Sho a pulwa ngele ye ongo omukwatelikomeho gwomalanditho ina ndhindhilika sha shapuka nomayalulo gomahangano ngaka gaali okwa ti , ita vulu oku yamukula epulo ndyoka.Etompelo limwe ndyoka oholomende ta yi tindi nguka a pewe iifutilemo ondyoka kutya nguka ota piyaganeke oombangi dhepangelo. Epangelo olya ti nguka aniwa okwa li nale a piyaganeke ombangi yimwe sho a tsakanene nomuniilonga omukwawo po AfriSam Sement pUuministeli Wemona nokwe mu indile opo emu etele oshihako nuumbapila womafutilo inaawu shangwa sha.Majiedt okwa ti okwa li a lombwele omuniilonga omukwawo kutya okwa hala oku hengapo omulume, ndele okwa ti shika osha li ashike omashendjo, a tsikile ta ti ye oku na uuthemba okupopya shoka a hala.Nonando Majiedt oku na nale ehokololo lyepogolo, okwa li a tindi oku gandja oshindji kombinga yalyo, a ti shoka osha pita na okwa hala okweetha shoka shikale shonale.Okwa tindi woo oku zimina kutya etompelo kutya, Ohorongo Cement oye mu kutha miilonga mu March nuumvo olya kwatathana nuulingilingi mboka a fekelelwa.Omapulapulo ngaka oga li ga ningwa pethimbo nguka ta ningi eindilo lyo kwiifutilamo mondholongo komeho gaMengestrata, Ruth Herunga oshiwike shika.