Longitheni nawa omatungo ngaka

OSHINYANGA shiigongi noshowo omatungo gaanangeshefa aashona noyopokati oga egululwa koMinista Yepangelo lyiitopolwa , iilando nomagumbo, Jerry Ekandjo ehulilo shiwike lya piti.Omatungo ngaka ota ga adhika poBethanie okalando okashona ke li muumbugantu woshilongo.

Oshinyanga shiigongi osha tungwa miikako itatu okuza omumvo 2008, komwaalu gwoodola oomiliona mbali, omanga omatungo gaanangeshefa aashona noyopokati geli ga tatu oga tungithwa koodola 150 000 ongo oshitopolwa shiilonga yepangelo.Ekandjo okwa fulu, woo oshitopolwa shotango shomukanka mpoka tapa tungwa oombelewa oompe dhelelo lyomukunda shilando gwa Bethanie. Omatungo ngaka oga tegelelewa ga ka pule oodola oomiliona mbali.Ekandjo okwa kumike elelo lya Bethanie noshowo oshigwana mpoka kutya oya pumbwa okugongala konyala lumwe nenge lwaali momwedhi ta ye shi ningile moshinyanga shoka noku kundathana omashongo ngoka ga taalela omukunda ngoka.Okwe ya indile ya longithe oshinyanga opo shaaninge sha fa oshihandhila sha thigwa po.Okwa pe elelo lyomukunda ngoka omayele opo ya thithe omatungo guunangeshefa kaanangeshefa aashona kondando yi li nawa , peha lyo ku ya futitha ondilo. Ekandjo okwa ti pamukalo nguka aanangeshefa mbaka ota ya ka kuta aantu oyendji miilonga mokalando hoka.Okwa kumike ishewe aakalimo yomo Bethanie opo ya futile omayakulo gawo gopamuni, opo ya kwashilipaleke egandjo lyomayakulo ge li nawa noga tya shoo.Okwa ti ngele omukalimo kehe gwomo Bethanie okwa futu omayakulo ge pethimbo, nena elelo noshowo oshilando mukunda sha Bethanie otashi ka koka nokweendelela.Okwa indile woo aaleli yomukunda nguka ya kale haya ningi omathaneko , ga dhiladhilwa nawa, geli pamwe niinakugwanithwa ta yi vulu okuyelekwa muunene wayo, momalalakano gayo noshowo oondjodhi dhago.Okwa ti kehe shoka elelo lyokalando haka ta li longo nali shininge nelalakano oku yakula nokugwanithapo oompumbwe dhaakalimo.