LLD a kutha miilonga aaniilonga ye li 77

OKAMPANI hayi hongo okawe ya Lev Leviev Diamonds (LLD)oya kutha miilonga aaniilonga yoopelesenda 72, molwashoka aniwa otayi nana nondatu kombinga yiiyemo.

Omuwilikukuluntu gwa LLD Kombandayedu Kapwanga mEtitatu lyoshiwike shika okwe shi koleke kutya aaniilonga ye li 77 oya kuthwa miilonga na ofaabulika yawo otayi ka kala ashike manga tayi opaleke iilongitho yawo yi kale monkalo yi li nawa sigo oshinima shenano nondatu lyeliko lyuuyuni sha shuna pevi.
Okwa ti ngashiingeyi mOfaabulika omwa thigala ashike aaniilonga ye li 30.
Kapwanga okwa mbaka aashoka ya thigala mo, oya thigwa opo ka ku kanithwe uunongo u li nawa miilonga mboka ye na, na ngele nee onkalo ya ti po hwepo ,uunongo wawo mbuka ota ye ke u upika.
Kapwanga okwa ti aaniilonga mboka ya kuthwa miilonga oya futwa oshimaliwa shethimbo ndyoka ya longo, ngashi naanaa tashi uthwa kOveta yAaniilonga.
Okwa ti kasha li sha pumbiwa okukundathana uupakete waaniilonga mbaka nomahangano gaaniilonga.
Molwashoka oga li nale ge shi tegelela shi ka ningwe omolu eliko lyuuyuni tali nana nondatu.
Kapwanga okwa ti oshinima shika oshe ya ehamekwa noonkondo, shi vulithe shoka ya li ya tegelela. ‘Osha li lela ina shi tegelelwa,’ ta tsikile ko kutya, kaya li ya tegelela shi k guma wo uunangeshefa weteto lyokawe.
Okawe oha ka landwa aniwa unene pethimbo lya Krismesa, ihe aniwa omumvo gwa zi ko – elanditho lya shuna pevi noopelesenda 40.
Okwa ti oshinima sheshunopevi lyelanditho lyokawe osha tameke mu Septemba.
Burhan Seber, e li Omunashipundi gwehangano lyOokampani dhokuhonga okawe lyedhina Diamond Manufacturers Association (DIAMAN) noku li wo Omukuluntuwiliki gwOkampani ya Hard Stone Processing, oya lombwele The Namibian kutya okwa tegelelwa natango ku kukuthwe aantu miilonga mOokampani dhokuhonga okawe.
Ihe okwa ti aaniilonga mboka taya ka kuthwa miilonga otashi vulika ya ka galululilwe kiilonga, ngele onkalo oya ti po hwepo.
Okampani ya Hard Stone inayi kutha natango omuntu miilonga na kayi na edhiladhilo okuninga ngaaka.
Nande ongaaka, okwa ti oshi li hwepo okushunithapevi elongitho lyoshimaliwa. Seber okwa ti molwashoka okawe ita ka landwa we nawa, ondando oya shuna pevi noonkondo.
Nande ongaaka, ehangano lya DIAMAN oli na einekelo kutya onkalo otayi ka hwepopala.