Okomisi yomahoololo yaNamibia yedina Electoral Commission of Namibia (ECN) oya ti ovanhu otava dulu okulishangifa opo va hoolole peenhele opo ve li molwoilonga.
Eshi okwa li sha popiwa komukulunhu wokomisi yomahoololo Zenia Lazen pefimbo opo kwa li a talela po eumbo lepangelo Etivali loshivike sha dja ko shi na sha nokunyamukula omapulo a endelela nghee omalishangifo omahoololo taa ende.
Eshi osha shikula omanyenyeto kutya ovahoololi vamwe itava dulu okulishangifa peenhele odo dihe li moikandjohoololo yavo.
“Okulishangifa kwetu kwomahoololo oku li pamukalo woikandjohoololo. Ngee ove li omu mOvenduka ndee ova hala ashike ve lishangifa omahoololo oupelesidente nomutumba wopashiwana, ovakalimo vaamu shaashi ohava longo omu, ohava i ashike komaumbo ngee ve na omafudo ile lumwe modula. Natango oshi li ehoololo lovahoololi kutya ova hala okuhoolola peni,” Klazen osho a ti ngaho.
Klazen okwa ti oshinima shi li paveta ovakwashiwana ve lishangife moshikandjohoololo omo hava di opo kukwashilipalekwe kutya embo lovahoololi ola tulwa kumwe mondjila she likolelela koikandjohoololo.
“Modula tai ya, ngee ova hala okuhoolola opo va dja, ove na okulishangifa oko. Ngee ova hala okuya va ka hoolole koKuisebmond kOmbaye, nena nava kwashilipaleke kutya ova ya oko ve ke lishangife,” Osho a ti ngaho.
Omuhoololi ou a hoolola opo oukwatya waye uha holoke okwa lombwela oThe Namibian Etine loshivike sha dja ko kutya kakwa li a pitikwa okulishangifa poVan Rhyn Primary School Etitatu loshivike sha dja ko shaashi ke shi omukalimo womoshikandjohoololo shaWindhoek West.
“Osha kitakana, peenhele dimwe owa pitikwa, pudimwe ino pitikwa,” Osho a ti ngaho
Omupopiliko wevava lovanyasha loSwapo Moses Shikerete okwa ti ovahoololi inava imbwa okulishangifa molweenhele oko va dja ndee noho oukwashili ou kutya omawi avo ohaa valulwa mokuxwepopaleka eenghalo meenhele omo nau fimanekwe.
Shikerete okwa ti ovahoololi ovo va hala okulishangifa moikandjohoololo yavo otava dulu okulishangifa momudo tau ya opo va kufe ombinga momahoololo oo taa ka kala ko momudo 2025 koitopolwahoololo yavo.
“Ovanhu vetu vahapu ovo ve li moitopolwa iheshi yavo ohava dulu okumona omauwa okudja kovaleli va hoololwa moikandjohoololo omo, onghee nee oshi li ashike pauyuki ngee va kufa ombinga momahoololo oitopolwahoololo nomalelo eedoolopa meenhele omo,” Osho a ti ngaho.
Shikerete okwa ti, ovakalimo vomOvenduka itava dulu okutya itava hoolola ovaleli vavo omanga natango tava pula omayakulo kelelodoolopa laVenduka ile koikandjohoololo yomOvenduka.
Omupopiliko wongudu yoIndependent Patriots for Change Immanuel Nashinge okwa ti omulandu nau ningwe upu.
“Otu na nale oikumungu yovahoololi inava hala okuhoolola. Itatu dulu vali okukala tu na omilandu dimwe inadi pumbiwa odo tadi ningi okulishangifa kwa kilikita,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
