Laina ya Kakwiyu a hulitha

OMUKALIMO gwomoSwakopmund, meme Laina ya Kakwiyu Namdhila (gwomimvo 42), okwa mana oondjenda ombaadhilila megumbo lye moka a li i itsuwa a sa.

Ehokololo lya pewa Oshifo shika ku German Shongolo Namadhila – ngoka e li omumwayina gwa nakusa, otali ti kutya Laina ina kala omunkundu nometi: 13 Januali 2010 oko a li kiilonga nokwa zimbuka nawa nokuya kegumbo ngashi shito.Ihe esiku lya landula (14 Januali 2010) ina thika ko kiilonga na aaniilonga pamwe naye oya kala ya limbililwa kutya omolwashike ina holoka kiilonga. Kuume ka nakusa Laina, tate Kleopas Ngwena okwa lombwele The Namibian kutya omasiku ga zi ko, okwa li a hala okumona kuume ke opo e mu halele omvula ompe ombwaanawa, ihe sho a yi kiilonga ye pombelewa ye okwa adha po okambapila ka shangwa kutya Laina kiilonga ote ke ya ko ashike momasiku 18 ga Januali 2010.Molwashoka okwa li a hala okumu mona noonkondo, Ngwena okwa li a tokola okuya kaandjawo (ya Laina). Sho Ngwena a konkola pomweelo gwegumbo, kapwa li ngoka te mu egulula. Sho nee a egulula omweelo ye mwene, okwi itsu Laina a eta ko omutse momweelo gwondunda ye a lala polupanda.Sho a dhimbulula kutya Laina iti inyenge, okwa tseyithile Opolisi naashiinda. Nakusa Laina omvalele yomomukunda Ontananga mOndonga na okwa i omuniilonga mOkampani ya Namib Contract Haulage (ano lyoombesa dho Swapo).Okwa li omwiimbi mongundulwiimbo ya mumwayina Shongolo mo Swakopmund nosho mongundulwiimbo ya Mwambo gwa Ambambi moSwakopmund.Oshituthihupulutho she otashi ningwa potundi ontihamano pegumbo ya meme gwe, Helena Kandjala pOntananga omanga efumviko tali ningwa ngula, okuzilila mOngeleka ya ELCIN pOntananga pomugoyi gwongula.Mboka mwa hala omauyelele galwe, monathaneni na Mwambo gwa Ambambi ko: 081 24 770 55 nenge na Rachel Namadhila ko: 081 25 24 911.