Kwa ulikwa Omunashipundi omupe gwOkomitiye yOuhamba wa Mbalantu

OMUULIKWAHAMBA mOmbalantu, tate Abisai Shilomhoka Heita, omonamati gwa nakusa Titus Aikanga Heita, okwa tseyitha kutya ezimo lyawo lyAakwaniilwa ya Mbalantu, olya ulika meekulu Albertina Heita a ninge Omunashipundi gwOkomitiye ndjoka tayi ungaunga nependulopo lyUuhamba waMbalantu.

Meekulu Albertina Heita, ngoka e li yina ya tate Abisai Heita, omukulukadhi gwa nakusa tatekulu Titus Heita, ngoka oye a li Omunashipundi gwOkomitiye ndjoka yi na sha nEpendulopo lyUuhamba waMbalantu.Tate Abisai Heita, ngoka pazimo lyawo lyUukwaniilwa wa Mbalantu, kuyele a langekelwe Omuulikwahamba ya Mbalantu konima yeso lyOmuulikwahamba kwali tate Kristof Aitula Mulamba. Nakusa tatekulu Mulamba okwa li a langekwa ongOmuulikwahamba ya Mbalantu meti 22 Juli 2000 pegumbo lye mOhamuyala mOmbalantu moka. Tate Abisai Heita ta ti meme gwe Albertina Heita, ota kala ta kwathelwa ku tatekulu Theobald Shambwangala gwomomukunda Ohamuyala mOmbalantu.Omusamane Heita, ta tseyitha wo, pazimo lyAakwaniilwa ya Mbalantu pambelewa kutya Omunashipundi gwOkomitiye yEpendulopo lyUuhamba waMbalantu tatekulu Titus Heita a mana oondjenda dhe pamwe nelenga lye tatekulu Shipahu Autanga. Ta ti tatekulu Titus Heita okwa hulithila mOshipangelo sha Kamhaku mOmbalantu ongulohi yeti 1 Septemba 2009 omanga tatekulu Shipahu a hulithila megumbo lye momukunda Ohambalanganga mOmbalantu meti 28 Auguste 2009. ‘Tate okwa thiga a tunga omukanka gwa kolelela metungululo lyUuhamba waMbalantu, pethimbo a kala omunashipundi gwOkokitiye yEpendulepo lyUuhamba wa Kamhaku ka Huhwa mOmbalantu, ‘Abisai Heita ta ti ngawo nokutsikila ko ta ti nakusa tate gwe okwe mu thigila wo elombwelo lya kola, ta ti ‘Kala mekwatathano ewanawa nOmusita Josef Avia, Omusita Josaphat Shanghala noshowo nomumbiishofi Kleopas Dumeni, mekondjo lyoye opo Uuhamba waMbalantu wu taambwe ko kEpangelo, ngashi mboka wAukwanyama wa taambiwa ko kEpangelo.