Kwa monika omasipa gaaakwashigwana yaali yomOshekedhiya

OPOLISI moShana oya tseyitha kutya opwa monika iipongo, yaakalimo yaali yomomukunda Oshekedhiya mUukwambi moShana mboka ya gwilile momeya ongulohi yeti 5 Maalitsa 2009 konima sho okawato kawo ka kandomithwa kombepo onene yoshikungulu manga ya li taya taaguluka oshana sha Shekedhiya.

Omasipa gaamboka ya monika, otaku tiwa kutya ogomugundjuka gwomomukunda Oshekedhiya, Aili Samwel Mumbala gwoomvula 27 noshowo gokamatyona koomvula omulongonaheyali 17 kedhina Jason Shigwedha, nako komomukunda Oshekedhiya.mOmasiku ngoka ga 5 ga Maalitsa omvula ndjika, nakusa Aili na Jason, oya adhikile taya zi kOshakati nokawato ka tate George Nangolo, ngoka oye wo ali te ka hingi. Ethimbo ndyoka olya li ethimbo lyomvula noshitopolwa ashihe sha Nooli osha li shuudha omeya, unene tuu ngoka gefundja.Tashi ti omilonga niishana oya kala yuudha omeya, naakalimo ngashi mboka yokombuga yUukwambi, oya li yi iningila uuwato wawo wokutaaguluka nawo omilonga niishana yomeya.Nangolo naye okwa li nee a ninga po okawato ke, hoka ya adhika nee yo na Aili na Jason taya taaguluka nako oshana sha Shekedhiya shuudha omeya, sho ka tenguka ngeyi ndele taya gu mo nokugwila momeya, ndele Aili na Jason taya si omeya.Nangolo okwa li a hupu, molwashoka okwa yogo nokuya pehala pu na okatuntu mpoka a zi nokuya megumbo kombanda yoshana shoka, hoka a zi nokufalwa koshipangelo shEpangelo sha Shakati, oshoka okwa li a yiwa kuutalala womeya unene.Opolisi oya kala nee tayi kongo Aili na Jason, okuza tuu ongulohi ndjoka yeti 5 Maalitsa 2009. Ya li ya kutha nedhagadhaga, ihe inayi mona po sha noyi ikondo ko kolukongo lwawo. mEtitatu lyoshiwike sha zi ko, aakalimo yokOshekedhiya, mboka ya li taya kwata oohi, oyiitsu momasipa gomuntu, ngoka sho Opolisi ya lopotelwa nokuya, ga dhimbululwa kutya oga Jason Shinyemba. mEtitano lya zi ko, oonakukwata oohi niishongo, oyi itsu wo natango momasipa nenge tu tye molutu lwomuntu, ngoka konima a ka dhimbululwa kutya oye Aili Samwel Mumbala, ngoka yo na Jason ya gwilile momeya ongulohi yeti 5 Malitsa 2009. Iipongo yawo oya zilwe ko nayo nokweetwa kOkila yOpolisi mOshakati nokonima yomakonaakono, Jason na Aili oya fumvikwa pomukunda gwawo
Oshekedhiya.