Kaura ota popitha oshigongi sho DTA mOshakati

OMUPRESIDENDE gwo Democratic Turnhalle Alliance (DTA) ya Namibia omusamane Katuutire Kaura mOsoondaha ndjika twa thinda yeti 24 Mei 2009 otaka popitha oshigongi oshinene sho DTA shoka tashi ka ningilwa pehala li li pokati kOngwediva nOshakati mElyambala mOngwediva mOshitopolwa sha Shana, tashi ka tameka pomulongo (10H00) gwongula.

Kakele komusamane Katuutire Kaura, Omupresidende gwOpevi gwoDTA, omusamane Fillemon Moongo, ngoka wo e li limwe lyomomalenga gOndonga, naye otaka tumbula sha poshigongi mpoka, tashi vulika oye ta ka taamba Kaura moshitopolwa shomoNooli, unene tuu mwaashoka sha Shana.Omvula ndjika omvula yomahogololo gOpaupresidende nogOshigongi shOpashigwana nokwa tegelelwa iiti yi kateke pethimbo lyiikonga yOmagogololo moka kehe ongundu tayi ka kutha ombinga momahogololo ngoka, tayi ke ya koshigwana noku shi lombwela kutya ngele oshe yi hogolola ¥ otayi ke shi ningila shike. Oshigwana otashi indilwa shi ye kiigongi mbyoka opo shi ka pulakene kaawiliki sho taya popi naashoka ya hala okuningila oshigwana ngele oshe ya hogolola.Omupresidende gwoshilongo Hifikepunye Pohamba, omathimbo ga zi k, okwa kala nokwiindila koshigwana sha Namibia shi ka kale mombili nomengungumano pethimbo lyiikonga yomahogololo nomehogololo lyolyene nokuhogolola yoyene nombili aawiliki yasho mboka sha hala. Omupresidende Pohamba ta ti naku kayandwe omashongathano kage li nawa, omahindathano nomaipumomumwe, ngashi ngoka ga holoka po omthimbo ga zi ko.