Kaura a tila e indjipalo lyaaChina muka

OMUSAMANE , Katuutire Kaura ota nyenyeta kutya epangelo lyOswapo otali ethele omeya mondunda sho Aachina taya mbombolokele moNamibia, lyo Epangelo lyOswapo lya mwena ashike.

Ta ti Aachina konima yethimbo otaya ka kala ye li petata lyAanamibia nokukutha ko iilonga yAanamibia ngashi ya kutha ko nale oongeshefa dhawo, unene tuu muumbangalantu woshilongo.Ye li mo taya landitha iinima yombiliha koshigwana nokutula oshigwana monkalo yombiliha.Omusamane Kaura ota ti mEpangelo lyoDTA, oshinima shAachina moNamibia otashi ka kala shi li mekondololo li li nawa notali uvitha kehe gumwe, ombili.Omupresidende gwo DTA, okwa popya wo kombinga yoonkondo dhaaleli yOpamuthigululwakalo, tadhi ende tadhi shunduka noku kana po, unene ngele tashi ya mevulikitho lyoshigwana shokomongula, shoka pethimbo ndika, sha pumbwa ezulo enene nolyomeendelelo.Ta ti nonande pu na ompango yokutya aanona inaya dhengwa we, oya pumbwa ngaa okuzulwa ngashi sha kala nale pamuthigululwakalo okupitila maaleli yopamuthigululwakalo.Omusamane Kaura ta ti, oshinima shaagundjuka taya nu nayi omalovu moNamibia osha pumbwa okuyiwa oonyala kEpangelo palongelokumwe naaleli yOpamuthigululwakalo.Omuwiliki gwoDTA, ta ti kutya ongundu ye oyi wete tashi ka kala oshiwanawa ngele oonakuyonenwa iinima yawo, ngashi ngeno omuntu a yakelwa sha, na shiye momake gAaleli yopamuthigululwakalo, opo nakuningilwa sha, nakuyonenwa, nakuyakelwa oshinima she e shi shunithilwe, ano oye a futilwe, ihe haku futa Epangelo ngashi tashi ningwa ngashingeyi pa pampangu dhopashitiligane ndhoka tu na nena moshilongo.Omupresidende gwoDTA okwa kondema wo noonkondo oshinima shekuthomo lyomala noshokweekelahi uuhanona koomeme aagundjuka. Te ya indile kutya naya ethe po oshinima shoka meendelelo ngashi tashi vulika. Okwa popi ndhika poshigongi shongundu ye mehulilo shiwike lya yi popepi nOngwediva.