Kanyama a findana mwaasho kwa li ta pula kombinga yotendela yokulanda omiti

Omhupanguli wokomhangu yopombada okwa ekelashi ehoololo lehangano olo hali lande oipumbiwa yepangelo ledina Central Procurement Board of Namibia (CPBN) olo kwa li la pitika ehangano ledina Cospharm Investments opo li kale tali lande omiti douministili wouhauku nomayakulo opanghalafano dongushu yoshimaliwa shi fike peebiliyona N$1,34.

Eshi oshi li efindano lomunangeshefa Shapwa Kanyama shaashi okwa li a pula omhangu opo i talulule eyandjo lotendela ei.

Omhupanguli Shafimana Ueitele okwa talulula ndee ta ningulula etokolo loCPBN. Konima eshi kwa li ya hoolola ehangano Cospharm Investments muAuguste odula ya dja ko opo li dule okukala tali lande oipumbiwa yopounamiti youministliti wouhaku, eshi okwa li sha ningwa momhangu yopomabada Etitano la dja ko.

Ehangano eli loCospharm okwali la lopotwa kutya oipambuliko yalo ihapu oyookana ke li koshi yeedula 18.

Ueitele okwa talulula ndee ta ningulula etokolo loCPBN muMei odula ya dja ko.

Omhupanguli natango okwa li a talulula ndee ta ningulula etokolo loCPBN muAugute odula ya dja ko, eshi kwa li la hoolola okuyandja otendela kovakufimbinga vamwe ovo kwa li va hoololwa tete.

Ehangano, Africure Pharmaceuticals Namibia, laShapwa Kanyama, okwa li la pula Omhangu yopombada opo i talulule oshinima eshi konima eshi eehelo layo lotete lokupewa otendela kwa li la lundululwa.

Onguduwiliki tete okwa li ya tokola opo ehangano loAfricure li kale tali lande omiti doministili dongushu yoshimaliwa shi fike peemiliyona N$123 oule weedula mbali.

Ehangano loCospharm Investments, olo kwa li eehelo lalo la ekelwashi, konima okwa li la pula oCPBN opo i talulule etokolo layo.
Odula ya dja ko muAuguste, ewilikongudu okwa li la ningulula etokolo lalo lotete ndee tali tokola okuyandja otendela kehangano ledina Cospharm opo li kale tali lande oipumbiwa yopauhaku yoministili oyo tai pula oshimaliwa shi fike peebiliyona N$1,3, omanga ehangano loAfricure okwa li la hoololwa opo li kale tali lande oinima yongushu yeemiliyona N$45.

Konima eshi Africure a ninga eehelo lomeendelelo opo etokolo olo la ningwa koCPBN nokomahangano a kwatelwa mo li talululwe, Omhangu yOpombada muKotomba odula yadja ko oya yandja elombwelo kelelowiliki opo liha ye komesho nokutula moilonga otendela omanga eehelo loAfricure opo sohinima eshi shi talululwe inali pwa.

Uitele mepangulo laye okwa popya kutya okatendo kokulanda oinima yepangelo oka popya kutya omukufimbinga keshe ota dulu okutula mo eindilo konima yomafiku aheyali opo etokolo loCPBN li talululwe.