Kanime a ningilwa oshipotha shuufuthi

NGOKA a li nale Omukuluntuwiliki gwOkomisi yOmahogololo ya Namibia, Fillemon Kanime pamwe nayakwawo yaali, oya lombwelwa ya holoke mOmpangu omwedhi tagu.

Shika oshi na sha aniwa nOmahogololo ga Muni pondoolopa ya Muthiya gomumvo gwa zi ko. Kanime okwa li aniwa ashike a lombwelwa kutya oku na okuholoka mOmpangu lwopotundi ontintatu mOsoondaha, nonande oshifokundaneki shimwe osha li nale sha lopota oshinima shika mEtitano.
‘Onde shi uvu ashike kaantu ya li ya lesha Oshifo kutya onda ningilwa oshipotha ,’ Kanime osho a lombwele The Namibian ngaaka.
Omutenya gwOsoondaha, Kanime okwa li a lombwele Oshifo shika kutya Omupolisi gumwe okwa li e eta kegumbo lye elombwelo kutya oku na okuholoka mOmangu. Kanime okwa li a tulwa mefulyo lyosipesiala mu Maalitsa 2008 omanga Omupeha gwe Ananiaa Elago, Omunambelewakuluntukondololi Hesekiel Shigwedha, Omukuluntu gwIikwambelewa Nicodemus Mingelius, ya li ya tulwa pevi uule woomwedhi konima sho pwa ende iinima kayi li nawa pomahogololo ga Muthiya.
Omahogololo ngaka oga li ge na okuningwa momasiku 29 ga Maalitsa 2008, ohe oga li guundulilwa komeho sho pwa holoka kutya opwa ningwa omaulingilingi, shoka sha li sha eta omahilathano pokati koongundu dhopapolitika.
Omahogololo ngaka oga ka ningwa nee mu Sepetmba 2008. Mu Febuluali nuumvo, ongungu yo Rally for Democracy and Progress odha li dhi idhenge mumwe piigongi yomahogololo.
Omupolisi gumwe omukiintu okwa li a tsuwa nombelw omanga omuntu gulwe a li a yahwa okusa pomweelo gwolugumbo lwoshilahite pOmuthiya, sha Amushanga-Ndjayi gwoSwapo, Pendukeni Iivula-Ithana.
Esiku ndyoka, Swapo na RDP ayehe oya li ye na iigongi pOmuthiya.
Aantu yalwe mboka ya lopotelwa uufuthi na Kanime, oyo Magnus Nangombe (omutamanekwa gwotango), ngoka aniwa edhina lye lya li lya holoka molista yaahogololo pOmuthiya muufuthi na Mingelius (omutamanekwa omutiyali.
Ayehe oya ningilwa oshipotha sheyako lyoofooloma dhokwiishangitha momahogololo ngaka.
Kanime okwa ningilwa oshipotha sho aniwa a fundju kutya Nangombe okwiishangitha shi li pauyuuki momahogololo ngaka. Ayehe yatatu otaya ka holoka mOmpangu momasiku 5 ga June 2009.
Nangombe, ngoka e li wo Omupresidende gwehangano lyOombesa nOotaxi mu Namibia,mOlyomakaya okwa li a popi kutya ye ina mona natango elombwelo ndika na okwa li ashike e shi lombwelwa ku Mingelius.