Kandetu otashi vulika a ka tidhwe miilonga

ONGUNDU tayi pangele, Swapo – oya ningi eindilo kutya Omukuluntuwiliki gwa NBC, Bob Kandetu na kuthwe mo miiloNga meendelelo, omolu epandela lyopaati yo Rally for Democracy and Progress (RDP) ndyoka NBC a ulike pethimbo Omupresidende Hifikepunye Pohamba a li ta gandja oshipopiwa she shomumvo omupe momasiku 31 ga Desemba.

Oshiwike sha zi ko ko, Amushanga gwOmauyelele gwoSwapo omusamane Jerry Ekandjo okwa li a popi pamushangwa kutya Kandetu oye e na okupewa ombedhi moshinima shika.
Okwa ti eholoko lyepandela lyo RDP konima yOmupresidende osha halutha nokulyalyakaneka oonkondo ewiliko lyo Swapo.
Ta ti, oshinima shika oshiwinayi noonkondo na osha ningwa nelalakano okunyateka edhina lyOmupresidende.
Ekandjo okwa ti Kandetu okwa kala nokwiiulika ong’omuyeluthi gwonyeka ya RDP na osha tseyika wo nawa kutya oku li oshilyo oshinene shopaati ndjika. Nande ongaaka, Kandetu okwa ekelahi omapopyo kutya oku li oshilyo sho RDP, ta ti kutya ye okwa li ashike a yambidhdiha Hidipo Hamutenya pethimbo a lyiikonga yokukonga mo ngoka ta ka kala okandidate yopaati mOmahogololo gOpaupresidende, molwashoka opaati oye li yi na aantu yatatu mboka ya li mondambo.
Yamwe mbeyaka yaali oya li Pohamba nOmuprimaminista Nahas Angula.
Kandetu okwa ti ye oku li oshilyo sho Swapo.
Oshiwike sha zi ko, Kandetu okwa li a gandja ombili koshigwana peha lyOkampani kombinga yepuko ndika lya holoka po, lya zi maaniilonga inaya longa paeveta dhOkampani.
Kandetu okwa popi wo kutya ota pu ka ningwa omakonakono moshinima shika.
Nande ongaaka, Ekandjo okwa ti egandjo lyombili lya Kandetu kali na shoka tali ka eta po molwashoka, oshinima shika osha yona nale opaati yawo.
Okwa ti Kandetu okwa ninga iinima oyindji ya puka mu NBC, mwa kwatelwa uukwamuhoko nokukala ashike a gandja kiilyo naayambidhidhi ya RDP opo a gwanitha po omahalo gopaati yawo. Ekandjo okwa hala Kandetu a tuthwe, pamwe nomuniilonga mOradio ya NBC melaka lyOshiwambo, Lapaka Ueyulu,
ngoka e li oshilyo shongumutima yo RDP nosho Menindjela gwOshikondo shi na sha nOoliisinisa dho Televisi mu NBC, Cecil Nguvauva.
Nguvauva oha popi wo aniwa nopiigongi yo RDP.Swapo okwa ti oshinima shika otashi ulike kutya RDP okwa dhina ooveta dhoshilongo noompango dhoongundu dhopapolitika na otashi ulike wo kutya RDP okwa hala okupiyaganeka oveta nelandulathano, opo mu ye omakuyunguto nokwaahenuukumwe.